راجوری اننت ناگ نشست پر بی جے پی مضبوط ترین دعویدار:رینا

جموں//
بھارتیہ جنتاپارٹی(بی جے پی) کے جموں وکشمیر یونٹ کے صدر رویندر رینا نے ہفتے کے روز کہا کہ سرینگر ، بارہ مولہ نشست پر بی جے پی اپنے امیدواروں کو کھڑا کرے گی۔انہوں نے کہاکہ کشمیر میں بی جے پی کا زبردست دبدبہ ہے اور اس بار یہاں کنول کا پھول کھلتا ہوا نظر آرہا ہے ۔
جموں میں نامہ نگاروں سے بات چیت کے دوران رینا نے کہاکہ جموں کشمیر کی پانچ پارلیمانی نشستوں پر بی جے پی کی جیت یقینی ہے ۔انہوں نے کہاکہ راجوری اننت ناگ سیٹ پر بی جے پی سب سے مضبوط ترین دعویدار ہے ۔ان کے مطابق سرینگر بارہ مولہ نشست پر بھی بی جے پی کی مضبوط پکڑ ہے اور اس بار کشمیر سے بھی بی جے پی کو سیٹ ملنے کی امید ہے ۔
سری نگر ، بارہ مولہ نشست پر امیدوار کھڑا کرنے کے بارے میں پوچھے گئے سوال کے جواب میں رینا نے کہاکہ بہت جلد ہم امیدواروں کا اعلان کرنے جارہے ہیں۔انہوں نے کہاکہ کشمیر میں بھارتیہ جنتاپارٹی کافی مضبوط ہے اور اس بار وادی میں کنول کا پھول ضرور کھلے گا۔
اپنی پارٹی، پیپلز کانفرنس کے ساتھ اتحاد کرنے کے بارے میں پوچھے گئے اور ایک سوال کے جواب میں رینا نے کہاکہ اس کا فیصلہ تو مرکزی قیادت ہی لے سکتی ہے ۔انہوں نے کہاکہ جو پارٹی کا فیصلہ ہوگا وہ ہمارے لئے سرآنکھوں پر ہے ۔
جموں وکشمیر کی پانچ پارلیمانی نشستوں پر بی جے پی کی جیت کو یقینی قرار دیتے ہوئے رویندر رینا نے کہاکہ بی جے پی نے اس حوالے سے سبھی تیاریاں مکمل کی ہیں۔انہوں نے کہاکہ جموں وکشمیر کے لوگ اس بار سبھی پانچ نشستوں پر بی جے پی کے امیدواروں کے حق میں ووٹ دیں گے ۔رویندر رینا کے مطابق اس بار کشمیر میں بھی کنول کا پھول کھلے گا کیونکہ لوگوں نے تہیہ کر کے رکھا ہواہے کہ وہ مودی جی کو تیسری مرتبہ وزیر اعظم منتخب کریں گے ۔
دریں اثنا ذرائع نے بتایا کہ سری نگر، بارہ مولہ نشستوں پر بی جے پی ہم خیال پارٹیوں کے ساتھ اتحاد کرنے کے بارے میں سنجیدگی کے ساتھ غور کررہی ہے ۔