سرینگر/۳۰مارچ
جموں سرینگرشاہراہ (این ایچ 44)کو جزوی طور پر بحال کیا گیا ہے۔
ٹریفک پولیس کے مطابق ناشری اور بنیہال کے درمیان پھنسی ہوئی گاڑیوں کو صاف کیا جارہا ہے۔ مسافروں کو مشورہ دیا جاتا ہے کہ وہ لین ڈسپلن پر عمل کریں ، محتاط طریقے سے گاڑی چلائیں کیونکہ رام بن اور بنیہال کے درمیان پتھر گرنے کا خدشہ ہے۔
اس دوران جموں و کشمیر کے کئی حصوں میں گزشتہ 24 گھنٹوں کے دوران بڑے پیمانے پر بارش ہوئی جبکہ بالائی علاقوں میں برفباری ہوئی جس سے درجہ حرارت میں کمی واقع ہوئی۔
سری نگر میں محکمہ موسمیات کے مرکز (ایم ای ٹی) نے اگلے 24 گھنٹوں کے دوران جموں و کشمیر میں ہلکی سے درمیانی بارش یا برف باری اور گرج چمک کے ساتھ بارش اور 31 مارچ سے بارش میں کمی کی پیش گوئی کی ہے۔
گزشتہ 24 گھنٹوں کے دوران سرینگر میں 29.7 ملی میٹر، پہلگام میں 35.4 ملی میٹر، گلمرگ میں 26.6 ملی میٹر، قاضی گنڈ میں 22.6 ملی میٹر، کوکرناگ میں 30.2 ملی میٹر اور کپواڑہ میں 20.2 ملی میٹر بارش ریکارڈ کی گئی۔
جموں خطے میں بنہال میں 43.8 ملی میٹر، بھدرواہ میں 16 ملی میٹر، بٹوٹے میں 29.2 ملی میٹر، کٹرا میں 37.4 ملی میٹر اور جموں میں 8 ملی میٹر بارش ریکارڈ کی گئی۔
سیاحتی مقام پہلگام سمیت بالائی علاقوں میں کل رات ہلکی برف باری ہوئی۔
سرینگر میں کم سے کم درجہ حرارت 6.8 ڈگری سینٹی گریڈ ریکارڈ کیا گیا جبکہ گزشتہ رات درجہ حرارت 8.2 ڈگری سیلسیس ریکارڈ کیا گیا تھا۔
محکمہ موسمیات نے بتایا کہ پہلگام میں کم سے کم درجہ حرارت1.3 اور گلمرگ میں منفی0.5 ڈگری سیلسیس ریکارڈ کیا گیا۔
محکمہ موسمیات نے اتوار تک موسم کے گیلے رہنے کی پیش گوئی کی ہے۔ محکمہ موسمیات کا کہنا ہے کہ یکم سے 5 اپریل کے درمیان موسم خشک رہے گا جبکہ 3 اپریل کو دور دراز مقامات پر ہلکی بارش ہوگی۔
