لوک سبھا الیکشن میں ریکارڈ توڑ ووٹنگ ہو گی :بدھوری

سرینگر//
ڈویڑنل انتظامیہ نے جمعرات کو کہا کہ وادی کشمیر میں ریکارڈ توڑ ووٹنگ متوقع ہے ۔
صوبائی کمشنر نے ان باتوں کا اظہار جمعرات کو یہاں نامہ نگاروں کے ساتھ بات کرنے کے دوران کیا۔
کشمیر کے ڈویڑنل کمشنر وجے کمار بدھوری نے کہا کہ انہیں میدان سے ملنے والی اطلاعات کے مطابق لوک سبھا انتخابات میں وادی میں ریکارڈ توڑ ووٹنگ ہونے کی توقع ہے۔
بدھوری نے کہا’’لوگوں کو ووٹ ڈالنے کے لیے آگے آنا چاہیے اور اس سلسلے میں وسیع انتظامات کیے گئے ہیں‘‘۔
صوبائی کمشنر کا کہنا تھا کہ مثالی ضابطہ اخلاق کے نفاذ بنیادی مقصد تمام پارٹیوں کو یکساں میدان فراہم کرنا ہوتا ہے ۔ان کا کہنا تھا کہ متعلقہ افسران اس کی مانیٹرنگ کر رہے ہیں۔
صوبائی کمشنر نے کہا کہ یہاں سالانہ امرناتھ یاترا کیلئے بھی انتظامات کئے جارہے ہیں۔
بدھوری نے کہا’’یاترا اور لوک سبھا انتخابات کی اپنی اپنی اہمیت ہے ، یاترا کے حوالے سے یاتریوں کو تمام تر سہولیات فراہم کی جانے کی کوشش کی جائے گی‘‘۔
سرینگر کی سڑکوں کے بارے میں ہوچھے جانے پر صوبائی کمشنر نے کہا کہ موسم بہتر ہونے کے ساتھ ہی ان پر بلیک ٹاپنگ کا کام شروع کیا جائے گا۔انہوں نے کہا کہ یہ کام چلتے رہتے ہیں ان پر مثالی ضابطہ اخلاق سے کوئی اثر نہیں پڑتا ہے ۔