بارہمولہ، پلوامہ اور سوپور میں تین منشیات فروش گرفتار‘ممنوع نشیلی اشیاء برآمد

سرینگر//
جموں وکشمیر پولیس نے بارہ مولہ ، پلوامہ اور سوپور میں تین منشیات فروشوں کو گرفتار کرکے ان کے قبضے سے ممنوع نشیلی اشیاء برآمد کرکے ضبط کی۔
پولیس کے ایک ترجمان نے بتایا کہ ٹنگمرگ میں پولیس نے ناکہ چیکنگ کے دوران ایک شخص کی گرفتاری عمل میں لا کر اس کے قبضے سے پچاس گرام چرس برآمد کیا۔
منشیات فروش کی شناخت اشفاق احمد خان ساکن چونٹ پتھری ٹنگمرگ کے بطور ہوئی ہے۔
ایس ایچ او کاکہ پورہ پلوامہ کی سربراہی میں پولیس ٹیم نے ریلوے کراسنگ کے نزدیک ناکہ لگایا جس دوران مشتبہ شخص نے پولیس کو دیکھتے ہی راہ فرار اختیار کرنے کی کوشش کی تاہم جموں وکشمیر پولیس کے اہلکاروں نے پیشہ وارانہ صلاحیتوں کوبروئے کار لا کر نوجوان کی گرفتاری عمل میں لا کر اس کے قبضے سے برون شوگر جیسی نشیلی اشیاء برآمد کی۔منشیات فروش کی شناخت عرفان ایوب خان ساکن بیگم باغ کے بطور کی گئی ہے۔
سوپور پولیس نے محمد الطاف ڈار ولد غلام قادر ڈار ساکن ممہ کاک سوپور کے گھر پر چھاپہ مارا اور وہاں تلاشی کے دوران۲۰۱۶نشہ آور کپشول اور۸۴سٹرپس برآمد کئے۔پولیس نے معاملے کی نسبت کیس درج کرکے تحقیقات شروع کی ہے۔
اسی درمیان ضلع ڈوڈہ میں واقع نیو بس اسٹینڈ کے قریب خصوصی چھاپہ ماری مہم کے دوران پولیس نے ایک جوڑے کو منشیات سمیت گرفتار کرلیا۔
ڈوڈہ نیو بس اسٹینڈ کے قریب پولیس کی خصوصی چھاپہ ماری مہم کے دوران نقد رقم بھی برآمد کی گئی۔
پولیس نے بتایا کہ مصدقہ ذرائع سے موصول ہونے والی اطلاع کی بنیاد پر کہ نیو بس اسٹینڈ ڈوڈہ کے قریب ایک شخص جنید قیوم ولد عبدالقیوم اور اس کی بیوی کو منشیات سمیت گرفتار کرلیا۔پولیس کو ان دونوں کو کافی دنوں سے تلاش تھی۔میاں بیوی ضلع میں منشیات فروشی کا دھندہ کرتے تھے۔اس جوڑے پر نوجوانوں کو منشیات سپلائی کرنے کا الزام ہے۔
پولیس نے مزید کہاکہ اطلاع کے ملنے کے فوراً بعد پولیس حرکت میں آگئی۔پی ایس آئی روشن لال کی قیادت میں ایک ٹیم تشکیل دی گئی تاکہ منشیات فروشوں کو پکڑا جاسکے۔پولیس کو اس کارروائی میں کامیابی ملی۔
اس سلسلے میں این ڈی پی ایس ایکٹ کی متعلقہ دفعات کے تحت ایف آئی آر نمبر۵۱/۲۰۲۴ درج کی گئی اور کیس کی تحقیقات شروع کردی گئی۔