الیکشن کمیشن آف انڈیا جموں کشمیر میں جمہوریت بحال کرے:عمر عبداللہ

سرینگر//
نیشنل کانفرنس کے نائب صدر عمر عبداللہ نے جمعہ کو کہا کہ الیکشن کمیشن آف انڈیا (ای سی آئی) کو جموں و کشمیر میں جمہوریت کی بحالی میں اپنا کردار ادا کرکے مرکز کے زیر انتظام علاقے میں پارلیمنٹ اور اسمبلی انتخابات کی تاریخوں کا اعلان کرنا چاہئے۔
عمر نے کہا کہ ہمیں الیکشن کمیشن سے کوئی توقعات نہیں ہیں۔ الیکشن کمیشن کو جمہوریت کو برقرار رکھنے کے اپنے مشن کے حصے کے طور پر اپنا کردار ادا کرنا چاہئے۔۱۰سال سے جموں و کشمیر میں اسمبلی انتخابات نہیں ہوئے ہیں۔
سابق صدر جمہوریہ رام ناتھ کووند کی قیادت والی کمیٹی کی جانب سے’ایک ملک ایک انتخابات‘کے بارے میں پیش کی گئی رپورٹ کا حوالہ دیتے ہوئے جموں و کشمیر کے سابق وزیر اعلی نے کہا کہ جموںکشمیر سے پالیسی شروع کرنے کا یہ ایک سنہری موقع ہے۔
عمرعبداللہ نے کہا کہ سابق صدر نے’ایک ملک، ایک الیکشن‘ پر ایک رپورٹ پیش کی ہے۔’’ ہم ان سے کیا امید کر سکتے ہیں: اگر آپ جموں و کشمیر سے شروعات نہیں کرتے ہیں تو ’ایک ملک ایک الیکشن‘ کا ڈھول بجانا۔ کیا یہ لوگوں کو بیوقوف بنانے کے لئے ہے‘‘؟
این سی نائب صدر نے کہا کہ جموں و کشمیر میں انتخابات ہونے چاہئیں اور یہ ایک سنہری موقع ہے۔ انہیں یہاں جمہوریت کو مکمل طور پر بحال کرنے دیں اور پارلیمنٹ اور اسمبلی انتخابات دونوں کی تاریخوں کا اعلان کریں۔
یہ پوچھے جانے پر کہ کیا پیپلز الائنس فار گپکار ڈیکلریشن (پی اے جی ڈی) اپنے اختلافات کو دور کرنے کے لئے آنے والے دنوں میں میٹنگ کرے گا، عبداللہ نے کہا کہ یہ سوال اتحاد کے عہدیداروں سے پوچھا جانا چاہئے۔
انہوں نے کہا کہ اگر کوئی میٹنگ ہوتی ہے تو آپ فاروق عبداللہ سے پوچھیں۔ میں پی اے جی ڈی کا عہدیدار نہیں ہوں، میرا تعلق نیشنل کانفرنس سے ہے۔ پی اے جی ڈی میں عہدہ رکھنے والوں سے پوچھیں۔
یہ پوچھے جانے پر کہ پارٹی آئندہ لوک سبھا انتخابات کیلئے اپنے امیدواروں کا اعلان کب کرے گی، نیشنل کانفرنس لیڈر نے کہا کہ جب بھی ہم چاہیں گے۔ (ایجنسیاں)