جموں میں سات مقامات پر ایس آئی اے کے چھاپے ، قابل اعتراض مواد ضبط :ترجمان

جموں/۱۵مارچ
ریاستی تحقیقاتی ایجنسی (ایس آئی اے ) نے جمعے کے روز ملی ٹینسی سازش کیس کے سلسلے میں جموں میں۷مقامات پر چھاپے مارے جس دوران قابل اعتراض مواد کو برآمد کرنے کا دعویٰ کیا گیا۔
ایس آئی اے کے ایک ترجمان نے بتایا کہ عدالت مجاز سے اجازت کے بعد سٹیٹ انوسٹی گیشن ایجنسی کی ٹیموں نے جمعے کے روز ڈوڈہ ضلع مین تین، ریاسی میں دو ، رام بن اور جموں میں دوالگ الگ مقامات پر چھاپے ڈالے ۔
ترجمان نے مزید کہاکہ ڈوڈہ میں حسن بابر اور محمد عرفان اور سبدار علی کے گھروں کو کھنگالا گیا، جبکہ ریاسی میں عبدالرشید اور شمشاد بیگم ، رام بن میں عبدالرشید نائیک اور سدرا جموں میں سجاد احمد عرف شادو کے رہائشی مکانوں کی تلاشی لی گئی۔
ایس آئی اے ترجمان کے مطابق تلاشی کے دوران کئی موبائیل فون اور قابل اعتراض مواد کو برآمد کرکے ضبط کیا گیا اور توقع ہے کہ ضبط کئے گئے مواد سے دہشت گرد نیٹ ورک کی تہہ تک پہنچنے میں مدد ملے گی۔
ترجمان نے بتایا کہ انٹیلی جنس رپورٹس کے مطابق یہاں متعدد بارڈر گائیڈ اور کوریرس سرگرم ہیں جو جو مختلف دہشت گرد تنظیموں کو دہشت گردوں کی در اندازی کرانے میں مدد کرتے ہیں اور ان کو دشوار گزار راستوں کی رہمنائی کرتے ہیں تاکہ وہ سیکورٹی فورسز کی طرف سے در اندازی مخالف رکاوٹوں کو عبور کر سکیں۔
ترجمان نے مزید بتایا کہ ان میں سے اکثر سرحد کے اس پار بیٹھے ہینڈلرز اور سرگرم دہشت گردوں کے ساتھ مختلف اپیلی کیشنز کا استعمال کرتے ہوئے اپنے موبائیل فون کے ذریعے رابطے میں ہیں۔