لوک سبھا کے ساتھ ہی جموں کشمیرمیں اسمبلی الیکشن کرائے جائیں:بخاری

سرینگر//
جموں کشمیر اپنی پارٹی کے صدر الطاف بخاری نے مرکز سے جموںکشمیر میں لوک سبھا اور اسمبلی انتخابات ایک ساتھ منعقد کرانے کی اپیل کی ہے ۔
بخاری نے کہا کہ جموں کشمیر میں حالات پر امن ہیں یہاں اسمبلی انتخابات فوراً سے پیشتر منعقد ہونے چاہئے ۔ان کا کہنا تھا’’مجھے اپنے پڑوسی ملک سے کوئی واسطہ نہیں ہے میری ذمہ داری ہے کہ یہاں جموں وکشمیر میں جمہوریت بحال ہوجائے ‘‘۔
اپنی پارٹی کے صدر نے ان باتوں کا اظہار ہفتے کے روز یہاں ایک تقریب کے حاشیہ پر نامہ نگاروں کے ساتھ بات کرنے کے دوران کیا۔
بخاری نے کہا’’مجھے اپنے پڑوسی ملک سے کوئی واسطہ نہیں ہے وہاں کیا ہو رہا ہے ، جموریت ہے یا نہیں یہ میری ذمہ داری نہیں ہے بلکہ میری ذمہ داری یہ ہے کہ یہاں جموں وکشمیر میں جمہوریت بحال ہو‘‘۔
اپنی پارٹی کے لیڈر کا کہنا تھا’’جموں وکشمیر میں اسمبلی انتخابات فوراٍ سے پیشتر منعقد ہونے چاہئے یہاں حالات پر امن ہیں یہاں لوک سبھا انتخابات اور اسمبلی انتخابات ایک ساتھ منعقد ہونے چاہئے ، یہ مرکز سے میری گذراش ہے کیو نکہ ہمیں پارلیمنٹ سے کچھ نہیں ملتا ہے ‘‘۔
بخاری نے کہا کہ اپنی پارٹی کے دروازے جموں وکشمیر کے تمام لوگوں کے لئے کھلے ہیں بشرطیکہ وہ کسی تشدد میں ملوث نہ ہوں۔انہوں نے کہا کہ ہمارے آئین ہند میں حقوق ہیں اور اپنی پارٹی ان کے حصول کے لئے لڑے گی۔
اپنی پارٹی کے سربراہ کا کہنا تھا کہ یہاں لوگوں کو اٹانومی، سیلف رول، محاذ رائے شماری کے نام پر لوگوں کو دھوکہ دیا گیا۔انہوں نے کہا کہ لوگ اپنی پارٹی میں شامل ہو رہے ہیں اور یہ کارواں مضبوط سے مضبوط تر ہو رہا ہے ۔