بلدیاتی اداروں میں او بی سی کوٹے کا بل منظور

نئی دہلی//
راجیہ سبھا نے جمعہ کو جموںکشمیر میں دیگر پسماندہ طبقات (او بی سی)‘ درج فہرست ذاتوں (ایس سی) اور درج فہرست قبائل (ایس ٹی) سے متعلق تین بلوں کو صوتی ووٹ سے منظور کرلیا ۔
مرکزی وزیر مملکت برائے داخلہ نتیانند رائے نے مقامی بلدیاتی اداروں میں او بی سی کو ریزرویشن فراہم کرنے سے متعلق جموں و کشمیر لوکل باڈیز قانون (ترمیمی) بل۲۰۲۴پر بحث کا جواب دیا۔
اس کے ساتھ سماجی انصاف اور تفویض اختیارات کے وزیر وریندر کمار نے آئین (جموں و کشمیر) شیڈول کاسٹس آرڈر (ترمیمی) بل‘۲۰۲۴اور قبائلی امور کے وزیر ارجن منڈا نے آئین (جموں و کشمیر) درج فہرست قبائل آرڈر (ترمیمی) بل ۲۰۲۴پیش کیا۔ اس کے بعد ان تینوں بلوں کو ایوان نے صوتی ووٹ سے منظور کر لیا۔
بحث کا جواب دیتے ہوئے رائے نے کہا کہ دفعہ۳۷۰کے خاتمے کے بعد جموں و کشمیر قوم کے مرکزی دھارے میں شامل ہوا اور اس کے بعد سے حکومت نے وہاں کے لوگوں کے تمام طبقات کو وہ حقوق اور مواقع فراہم کیے ہیں جو ملک کے آئین کے مطابق ملک کے باقی حصوں میں حاصل ہیں۔
انہوں نے کہا کہ جموں کشمیر میں او بی سی کو ریزرویشن دینے کے لیے لایا گیا یہ بل اسی سلسلے کی ایک کڑی ہے ۔
وزیر مملکت برائے داخلہ نے کہا کہ اب مرکز کے زیر انتظام علاقے کی او بی سی برادری کو تعلیم اور ملازمتوں میں ریزرویشن کی سہولت ملے گی اور انہیں مساوی مواقع ملیں گے ۔
بحث کا جواب دیتے ہوئے ڈاکٹر کمار نے کہا کہ بالمیکی برادری کے لوگ جنہیں پنجاب سے جموں کشمیر میں صفائی کے لیے لایا گیا تھا، ریزرویشن سے محروم ہو گئے ہیں۔ ان کو ریزرویشن کے دائرے میں لانے کیلئے یہ ترمیمی بل لایا گیا ہے ۔ اب اس بل کی منظوری سے اس کمیونٹی کے لوگوں کو ایس سی کے مخصوص کوٹے کے تحت ریزرویشن اور سہولیات مل سکیں گی۔
ڈاکٹر کمار نے کہا کہ جب سے مودی حکومت اقتدار میں آئی ہے ، درج فہرست ذاتوں اور درج فہرست قبائل کو ان کے حقوق دیے جا رہے ہیں اور یہ حکومت سب کا ساتھ،سب کا وکاس کے فلسفوں کے ساتھ کام کر رہی ہے ۔
ارجن منڈا نے کہا کہ آرٹیکل۳۷۰ہٹائے جانے کے بعد سے مودی حکومت جموں و کشمیر کے لوگوں کو ملک کے مرکزی دھارے سے جوڑنے کا کام کر رہی ہے اور اس کے تحت ملک کی ریاستوں میں انہیں تمام سہولیات فراہم کی جا رہی ہیں۔ جموں و کشمیر کے درج فہرست قبائل کو ریزرویشن دینے کے لیے بھی کام کیا جا رہا ہے ۔ یہ بل بھی اسی سمت میں لایا گیا ہے ۔
اس کے بعد ایوان نے ان تینوں بلوں کو صوتی ووٹ سے منظور کر لیا۔