کولگام میں بد نام زمانہ منشیات فروش کی جائیداد کو قرق کیا گیا:پولیس

سرینگر//
منشیات فروشوں کے خلاف کارروائیوں کو جاری رکھتے ہوئے پولیس نے جنوبی کشمیر کے ضلع کولگام کے دیوسر علاقے میں ایک بدنام زمانہ منشیات فروش کی جائیداد کو قرق کر دیا۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس نے کولگام کے دیوسر علاقے میں ایک بدنام زمانہ منشیات فروش کے دو منزلہ رہائشی مکان کو این ڈی پی ایس ایکٹ کے متعلقہ دفعات کے تحت قرق کر دیا۔
بیان میں منشیات فروش کی شناخت خورشید احمد بٹ ولد محمد اسماعیل بٹ ساکن سوپٹ دیوسر کے بطور کی گئی ہے ۔انہوں نے کہا کہ مذکورہ منشیات فروش این ڈی پی ایس کے کئی کیسوں میں ملوث ہے ۔
ترجمان نے کہا کہ پولیس کی طرف سے کی گئی تحقیقات کے دوران مذکورہ جائیداد کی شناخت غیر قانونی طور حاصل شدہ جائیداد کے طور پر ہوئی ہے ۔
بیان میں کہا گیا’’یہ جائیداد پہلی نظر میں مالک کی جانب سے منشیات اور سائیکو ٹراپک مواد کی غیر قانونی اسمگلنگ سے حاصل کی گئی تھی‘‘۔ان کا کہنا تھا کہ مذکورہ بد نام زمانہ منشیات فروش اس وقت کوٹ بلوال جموں مین پی آئی ٹی این ڈی پی ایس ایکٹ کے تحت بند ہے ۔
دریں اثنامعاشرے سے منشیات کی بیخ کنی کو یقینی بنانے کیلئے جنگ کو جاری رکھتے ہوئے پولیس نے شمالی کشمیر کے ضلع بارہمولہ میں۲بد نام زمانہ منشیات فروشوں پراین ڈی پی ایس ایکٹ کے تحت مقدمہ درج کیا ہے ۔
پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس نے بارہمولہ میں۲بدنام زمانہ منشیات فروشوں پر این ڈی پی ایس ایکٹ کے تحت مقدمہ درج کیا ہے ۔
ترجمان نے کہا کہ دونوں کو کوٹ بلوال جیل جموں میں بند رکھا گیا ہے ۔ بیان میں منشیات فروشوں کی شناخت شاہد منظور ڈار ولد منظور احمد ڈار ساکن محلہ میر صاحب بارہ مولہ اور شبیر احمد وانی عرف حبی ولد جلال الدین ساکن سنگھ پورہ کے بطور کی گئی ہے ۔
پولیس ترجمان نے کہا کہ مجاز حکام سے اجازت حاصل کرنے کے بعد مذکورہ منشیات فروشوں پر این ڈی پی ایس ایکٹ کے تحت مقدمہ درج کیا گیا ہے ۔
ترجمان نے کہا کہ ان منشیات فروشوں کے خلاف کئی مقدمے درج ہیں اور یہ لوگ بارہمولہ ، پٹن وغیرہ علاقوں میں منشیات کے کاروبار کو فروغ دینے اور نوجوانوں میں منشیات سپلائی کرنے میں ملوث تھے ۔
ان کا کہنا تھا کہ کئی مقدموں میں ملوث ہونے کے باوجود بھی یہ لوگ اپنی حرکتوں سے باز نہیں آتے تھے ۔