پنچایت انتخابی فہرست کو اپ ڈیٹ کرنے کیلئے نظرثانی شیڈول جاری

جموں//
ریاستی الیکشن کمیشن (ایس ای سی) نے مرکز کے زیر انتظام جموں کشمیر میں پنچایت انتخابی فہرست ۲۰۲۴ کو اپ ڈیٹ کرنے کی تاریخوں کا نوٹیفکیشن جاری کردیا ہے۔
کمیشن کی جانب سے جاری نظرثانی شیڈول کے مطابق پنچایت انتخابی فہرست کے مسودے کی اشاعت۱۵ جنوری۲۰۲۴سے شروع ہوگی۔اس کے علاوہ۱۸سال کی عمر حاصل کرنے والے اور پنچایت انتخابی فہرست۲۰۲۴میں اپنا نام درج کرانے کے اہل ہونے والے تمام افراد کیلئے یکم جنوری۲۰۲۴کو کوالیفائنگ تاریخ کے طور پر رکھا گیا ہے۔
اسی طرح دعوے داخل کرنے، اضافے، حذف کرنے، اصلاح اور منتقلی کے لیے اعتراضات کی مدت ۱۵ جنوری سے ۵فروری۲۰۲۴ تک ہوگی۔ الیکٹورل رجسٹریشن آفیسر (ای آر او) کی جانب سے دعووں اور اعتراضات کو نمٹانے کی تاریخ ۱۶فروری۲۰۲۴ ہوگی جبکہ انتخابی فہرست ۲۰۲۴کی حتمی اشاعت ۲۶فروری۲۰۲۴ کو کی جائے گی۔
شیڈول میں یہ بھی بتایا گیا ہے کہ پولنگ بوتھ مقامات پر خصوصی کیمپ لگائے جائیں گے۔ پنچایت الیکشن بوتھ افسر (پی ای بی او) جس میں گاؤں کی سطح کے کارکن (وی ایل ڈبلیو)، کثیر المقاصد کارکن (ایم پی ڈبلیو) اور گرام روزگار سیوک (جی آر ایس) کے ساتھ اسمبلی بوتھ لیول افسر شامل ہیں‘۲۷/۲۸ جنوری اور۳/۴ فروری۲۰۲۴کو رائے دہندگان کی رہنمائی کے لئے مطلوبہ فارم اور پنچایت رول کے ساتھ دستیاب رہیں گے۔