سپریم کورٹ کی ہم جنس پرستوں کی شادی قانونی قرار دینے کی اپیل مسترد

نئی دہلی//
سپریم کورٹ نے منگل کے روز ہم جنس پرستوں کی شادی کو قانونی حیثیت دینے کی عرضی خارج کردی۔
چیف جسٹس ڈی وائی چندرچوڑ کی سربراہی میں پانچ ججوں کی آئینی بنچ نے تین بمقابلہ دو ووٹوں سے ہم جنس پرستوں کی شادی کو تسلیم کرنے کے مطالبے کو مسترد کر دیا اور کسی تشدد، جبر یا مداخلت کے بغیر ان کے ساتھ رہنے کے حق کو برقرار رکھا۔
آئینی بنچ نے اکثریتی فیصلے میں کہا کہ قانون ہم جنس جوڑے کے شادی کے حق کو تسلیم نہیں کرتا ہے ۔ اس پر واضح قانون بنانا پارلیمنٹ کا کام ہے ۔
چیف جسٹس چندرچوڑ اور جسٹس کول نے ہم جنس شادی کے حق کو سمجھا اور ایسے ہم جنس جوڑوں کو نتیجے کے فوائد دینے کے حق کو برقرار رکھا۔
فیصلہ سناتے ہوئے چیف جسٹس چندرچوڑ نے کہا کہ اس معاملے کا فیصلہ کرنا عدالت کے دائرہ اختیار سے باہر ہے اور پارلیمنٹ کو شادی سے متعلق قوانین وضع کرنے چاہئیں۔
دوسری طرف جسٹس بھٹ، جسٹس کوہلی اور جسٹس نرسمہا نے ہم جنس جوڑے کی شادی کو تسلیم کرنے سے انکار کر دیا۔
آئینی بنچ کے ارکان نے تاہم مرکزی حکومت کے اس بیان کو متفقہ طور پر ریکارڈ پر لیا کہ وہ ہم جنس جوڑے کو دیے گئے حقوق اور فوائد کو ضابطہ بند کرنے کیلئے ایک کمیٹی تشکیل دے گی۔
بچہ گود لینے کے معاملے میں، جسٹس چندرچوڑ اور جسٹس کول نے ہم جنس جوڑوں کو حق دیا، لیکن دیگر تین ججوں نے اس نظریے سے اتفاق نہیں کیا اور سی اے آر اے کے قوانین کی درستگی کو برقرار رکھا جن کے تحت ہم جنس پرستوں اور غیر شادی شدہ جوڑوں کو بچہ گود لینے سے باز رکھا گیا ہے ۔
جسٹس چندر چوڑ، جسٹس سنجے کشن کول، جسٹس ایس رویندر بھٹ، جسٹس ہیما کوہلی اور جسٹس پی ایس نرسمہا کی آئینی بنچ نے۱۰دنوں تک متعلقہ فریقوں کے دلائل سننے کے بعد ۱۱مئی۲۰۲۳کو فیصلہ محفوظ رکھ لیا تھا۔
درخواست گزاروں نے دلیل دی تھی کہ ہم جنس پرستوں کی شادی کو تسلیم نہ کرنا مساوات، آزادی اظہار اور وقار کے حقوق کی خلاف ورزی ہے ۔ درخواست میں یہ بھی کہا گیا کہ عدالت عظمیٰ کو اس کمیونٹی کے سماجی تحفظ اور دیگر فلاحی منصوبوں تک رسائی کے لیے بھی مناسب ہدایات جاری کرنی چاہئیں۔
مرکزی حکومت نے عرضی گزاروں کی سخت مخالفت کی تھی۔ حکومت نے دلیل دی تھی کہ درخواست گزاروں کے مطالبے کو منظور کرنے سے پرسنل لاز کے معاملے میں بہت خراب صورتحال پیدا ہو جائے گی۔
حکومت نے عدالت عظمیٰ میں یہ بھی کہا تھا کہ اس موضوع کو صرف مقننہ ہی ہینڈل کر سکتی ہے (اس کے وسیع تر سماجی نتائج کی وجہ سے )۔ مرکزی حکومت نے یہ بھی دعویٰ کیا تھا کہ صرف سات ریاستوں نے ہم جنس پرستوں کی شادی کے معاملے پر پوچھے گئے سوال کا جواب دیا ہے ۔ ان میں سے راجستھان، آندھرا پردیش اور آسام نے اس طرح کی شادیوں کے لیے قانونی منظوری مانگنے والے درخواست گزاروں کے دلائل کی مخالفت کی ہے ۔
آئینی بنچ کے سامنے سماعت کے دوران، سینئر وکلاء اے ایم سنگھوی، راجو رام چندرن، کے وی وشوناتھن، آنند گروور اور سوربھ کرپال نے۲۱درخواست گزاروں کی نمائندگی کی۔