’دہشت گردی سب سے بڑا چیلنج‘:گردی کی صحیح تشریح پر اتفاق رائے نہ ہونا افسوسناک :مودی

سرینگر//
دہشت گردی کو دنیا کیلئے سب سے بڑا چیلنج قرار دیتے ہوئے وزیر اعظم نریندر مودی نے جمعہ کو کہا کہ دنیا میں کہیں بھی اور کسی بھی شکل میں دہشت گردی انسانیت کے خلاف ہے اور زور دے کر کہا کہ یہ وقت امن اور بھائی چارے کا ہے اور ساتھ چلتے ہوئے آگے بڑھنے کا ہے۔
مودی نے یہ بھی کہا کہ دنیا کے کسی بھی حصے میں تنازعات اور تصادم ہر ایک کو متاثر کرتے ہیں اور کسی کو فائدہ نہیں پہنچاتے۔
یہاں نویں جی۲۰پارلیمانی اسپیکرز سمٹ(پی ۲۰)کے افتتاحی اجلاس سے خطاب کرتے ہوئے مودی نے یہ بھی کہا کہ ہمیں عالمی اعتماد کی راہ میں حائل رکاوٹوں کو دور کرنا ہوگا۔انہوں نے کہا کہ یہ وقت امن اور بھائی چارے کا ہے اور ساتھ مل کر آگے بڑھنے کا وقت ہے۔
وزیر اعظم کا یہ تبصرہ ہفتے کے آخر میں حماس کے عسکریت پسندوں کی طرف سے اسرائیلی قصبوں پر حملوں کے کے پس منظر میں آیا ہے جس نے خطے میں تازہ کشیدگی کو جنم دیا ہے۔
تقریباً ۲۰سال قبل پارلیمنٹ ہاؤس پر حملے کا ذکر کرتے ہوئے وزیر اعظم نے کہا کہ ہندوستان سرحد پار سے دہشت گردی کا سامنا کر رہا ہے جس نے ہزاروں معصوم جانیں لی ہیں۔انہوں نے کہا کہ دنیا اب سمجھ رہی ہے کہ دہشت گردی کتنا بڑا چیلنج ہے۔’’ دہشت گردی کہیں بھی ہو، کسی بھی صورت میں، انسانیت کے خلاف ہے‘‘۔
مودی نے کہا کہ دہشت گردی کی صحیح تشریح پر آج تک اتفاق رائے نہ ہونا افسوسناک ہے کیونکہ انسانیت کے دشمن اسی کا فائدہ اٹھاکر پوری انسانیت کو تباہ و برباد کرنے پر آمادہ ہیں ۔
وزیر اعظم نے کہا کہ پی۲۰کی کانفرنس پوری دنیا کی مختلف پارلیمانی اسپیکرس کا مہا کنبھ ہے ۔ آپ سب کا ہمارے ملک کو میزبانی کا موقع دینا ہمارے لئے باعث مسرت ہے ۔ انہوں نے کہا کہ جی ۲۰کی سربراہی کے دوران ہندوستان نے پورے سال ڈیلی گیٹس کی میزبانی کی ، جس سے پورے سال ملک میں تہوار کا ماحول رہا اور پھر حال ہی میں جی۲۰کا کامیاب انعقاد کیا گیا، جس میں ہندوستان نے افریقن یونین کو جی۲۰کا مستقل رکن بنانے کی پرزور وکالت کی ، جس کی تمام ارکین نے بھرپور تائید کی اور اسے رکن بنانے کی اپنی منظوری دی۔
مودی نے کہا کہ کسی بھی ملک کی طاقت اس کے عوام ہوتے ہیں۔ عوام ہی حکومت کو منتخب کرتے اور اپنی پسند کی سرکار بناتے ہیں۔ اس طرح عوام حکومت بناتے ہیں، مگر حکومت اتفاق رائے سے چلتی ہے ۔ انہوں نے کہا کہ ہمارا فلسفہ یہ ہے کہ پوری دنیا ایک خاندان ہے ، اس لئے ہم سب کو مل کر اور متحد ہوکر ایک ساتھ چلنے کی ضرورت ہے اور دنیا کو درپیش چیلنجوں کا ساتھ مل کر مقابلہ کرنے کی ضرورت ہے ۔
وزیراعظم مودی نے کہا کہ سال۱۹۴۷میں اپنی آزادی کے بعد سے ہندوستان نے اب تک۱۷جنرل الیکشن کرائے ہیں جبکہ۳۰۰سے زائد ریاستی اسمبلی انتخابات ہوچکے ہیں۔ ہندوستان صرف الیکشن ہی نہیں کراتا بلکہ لوگوں کو ووٹنگ میں حصہ لینے کے لئے راغب بھی کرتا ہے ۔
مودی نے کہا کہ ہندوستان میں ۲۰۱۹میں۹۰کروڑ رجسٹرڈ ووٹرس تھے‘جو یوروپ کی مجموعی آبادی سے زائد ہے ۔ ان میں سے۶۰کروڑ ووٹروں نے اپنے حق رائے دہی کا استعمال کیا جن میں خواتین کی شرکت سب سے زیادہ رہی اور انہوں نے ریکارڈ ووٹ ڈال کر ہماری حکومت کو دوسری بار منتخب کیا۔