’لوگ تنازعات کے منافع خوروں کو الگ تھلگ کریں‘

سرینگر//
لیفٹیننٹ گورنر‘ منوج سنہا نے پیر کو کہا کہ لوگوں کو سماج میں تنازعات کے منافع خوروں کو الگ تھلگ کرکے ایک پرامن اور خوشحال جموں و کشمیر کے قیام میں اپنا کردار ادا کرنا ہوگا۔
سنہا نے یہاں سے ۱۵کلومیٹر دور بڈگام میں ایک نئے ضلع ہسپتال کا سنگ بنیاد رکھنے کے بعد کہا’’میری آپ سب سے درخواست ہے کہ ان عناصر کی نشاندہی کریں جو جموں و کشمیر میں امن اور ہم آہنگی کو خراب کرنا چاہتے ہیں۔ کچھ پہلے ہی بے نقاب ہو چکے ہیں لیکن کچھ اب بھی پردے کے پیچھے سے کام کر رہے ہیں‘‘۔
ایل جی نے کہا’’ان عناصر کو معاشرے میں تنہا کرنا عوام کی ذمہ داری ہے۔ سیکورٹی فورسز، پولیس اور انتظامیہ اپنا کام کر رہے ہیں لیکن عوام کو اپنا کردار ادا کرنا ہو گا‘‘۔
سنہا نے افسوس کا اظہار کیا کہ زیادہ تر لوگ اپنے حقوق کو یاد رکھتے ہیں لیکن قوم کے تئیں اپنے فرائض کو نظر انداز کرتے ہیں۔
لیفٹیننٹ گورنرکاکہنا تھا’’اس کا ایک اور رخ بھی ہے۔ عوام میں سے کئی نوجوان دہشت گردوں سے لڑنے کے لیے اٹھ کھڑے ہوتے ہیں اور ملک کی یکجہتی اور سالمیت کی حفاظت کے لیے اپنی جانیں قربان کر دیتے ہیں‘‘۔
سنہا نے سیکورٹی اہلکاروں کا حوالہ دیتے ہوئے کہا، ’’ہمارے بیٹے (کرنل) من پریت، (میجر) آشیش، (ڈی وائی ایس پی) ہمایوں، مدثر یا سیف اللہ (دونوں کانسٹیبل) ہوں جنہوں نے آپ کے امن اور خوشحالی کے لیے اپنی جانیں قربان کیں۔ دہشت گردوں کی گولیاں‘‘۔
ایل جی کا مزید کہنا تھا’’تو، اب سوچنے کا وقت ہے ‘ ہم کیا کر سکتے ہیں؟ ہم نئے جموں و کشمیر کی ترقی میں کیا کردار ادا کر سکتے ہیں؟ ‘‘
سنہا نے کہا کہ اگر ہر شہری اپنے حقوق مانگنے کے ساتھ ساتھ اپنے فرائض بھی ادا کرے تو ’’کوئی طاقت جموں و کشمیر کو ترقی سے نہیں روک سکتی‘‘۔
ایل جی نے کہا’’عام طور پر، ہم اپنے فرائض سے غافل ہو جاتے ہیں اور اسی وقت مسائل پیدا ہونا شروع ہو جاتے ہیں‘‘۔انہوں نے کہا کہ انتظامیہ جموں کشمیر کے لوگوں کی مشکلات کو کم کرنے کے جذبے کے ساتھ کام کر رہی ہے۔
لیفٹیننٹ گورنر کاکہنا تھا’’کوئی آنسو بہائے گا تو پونچھیں گے۔ اگر ہم حقوق اور فرائض کے احترام کے ساتھ اس جذبے کے ساتھ کام کرتے ہیں تو آنے والے دنوں میں جموں و کشمیر ایک ترقی یافتہ ہندوستان میں اہم کردار ادا کرے گا‘‘۔
سنہا نے کہا’’عام طور پر، ہم چاہتے ہیں کہ حکومت سب کچھ کرے کیونکہ یہ حکومت کی ذمہ داری ہے۔ لیکن کیا شہری اپنے دل پر ہاتھ رکھ کر کہہ سکتے ہیں کہ وہ جو کچھ بھی کریں گے، جموں و کشمیر کے وقار اور قومی پرچم کی حفاظت کے لیے کریں گے‘‘۔
لیفٹیننٹ گورنر نے کہا’’ریشی پورہ بڈگام میں ضلع ہسپتال کمپلیکس کا سنگ بنیاد رکھنا ترقی کے حوالے سے آج کا دن ہم سب کیلئے ایک تاریخی دن ہے ‘‘۔ان کا کہنا تھا’’۱۲۵بستروں پر مشتمل یہ ہسپتال لوگوں کے دیرینہ مطالبے اور صحت کی تمام سہولیات ایکی ہی چھت کے نتیچے رکھنے کا خواب پورا کرے گا‘‘۔
سنہا کا کہنا تھا’’یو ٹی انتظامیہ خوف سے پاک، دہشت گردی سے پاک، بد عنوانی سے پاک اور مستقبل پر مبنی جموں وکشمیر بنانے کیلئے پر عزم ہے ‘‘۔انہوں نے کہا’’میں لوگوں کو یقین دلانا چاہتا ہوں کہ ہم جموں وکشمیر کو دہشت گردی سے پاک بنائیں گے یہ ہمارا عزم ہے۔‘‘