لہیہ میں فوجی گاڑی کو حادثہ ۹ فوجی ہلاک‘وزیر دفاع کا اظہار غم

سرینگر/۱۹اگست
حکام نے بتایا کہ ہفتہ کے روز لداخ کے لیہہ ضلع میں ایک فوجی گاڑی سڑک سے پھسل کر گہری کھائی میں گرنے سے نو فوجی ہلاک اور ایک شدید زخمی ہو گیا۔
حکام نے بتایا کہ یہ حادثہ جنوبی لداخ کے نیوما میں کیاری کے قریب پیش آیا۔
لیہہ کے سینئر سپرنٹنڈنٹ آف پولیس‘ پی ڈی نیتیا نے بتایا کہ فوج کی گاڑی، جس میں ۱۰ اہلکار سوار تھے، لیہہ سے نیوما جا رہی تھی جب اس کے ڈرائیور نے کنٹرول کھو دیا اور یہ شامپونے پانچ بجے ایک گھاٹی میں گر گئی۔
پولیس کی ایک ٹیم موقع پر پہنچی اور تمام زخمی فوجیوں کو آرمی کے طبی مرکز میں منتقل کیا گیا جہاں آٹھ اہلکاروں کو مردہ قرار دیا گیا۔ اس نے بتایا کہ بعد میں ایک اور جوان کی موت ہو گئی۔
افسر نے بتایا کہ ایک اور جوان کا علاج چل رہا ہے اور اس کی حالت نازک بتائی گئی ہے۔
دریں اثنا لہیہ میں فوجی گاڑی کو پیش آئے حادثے پر سیاسی ، سماجی تنظیموں نے رنج وغم کا اظہار کرتے ہوئے لواحقین کے ساتھ تعزیت کا اظہار کیا ہے۔
مرکزی وزیر دفاع راجناتھ سنگھ نے اس حادثہ پر رنج و غم کا اظہار کیا۔انہوں نے ٹویٹ کرتے ہوئے کہا ”لداخ میں لیہہ کے قریب ایک حادثے کے نتیجے میں بھارتی فوج کے جوانوں کے نقصان پر غمزدہ ہوں۔ ہم اپنی قوم کے لیے ان کی مثالی خدمات کو کبھی فراموش نہیں کریں گے۔ میرے خیالات سوگوار خاندانوں کے ساتھ ہیں۔ زخمی اہلکاروں کو فیلڈ ہسپتال منتقل کر دیا گیا ہے۔ ان کی جلد صحت یابی کی دعاگو“۔
قابل ذکر ہے کہ یہ حادثہ کرگل دراس علاقہ میں ہوئے ایک پراسرار دھماکے کے ایک روز بعد پیش آیا۔ اس دھماکے میں تین لوگ ہلاک جبکہ۱۰ دیگر زخمی ہوئے تھے۔اس حوالے سے مزید تفصیلات کا انتظار ہے۔