بارہمولہ میں لشکر طیبہ کے۲جنگجو معاونین گرفتار، اسلحہ وگولہ بارود بر آمد:پولیس

سرینگر//
جموںکشمیر پولیس نے شمالی کشمیر کے ضلع بارہمولہ کے کریری علاقے میں لشکر طیبہ سے وابستہ۲جنگجو معاونین کو گرفتار کرکے ان کی تحویل سے اسلحہ و گولہ بارود بر آمد کرنے کا دعویٰ کیا ہے ۔
پولیس ترجمان نے اپنے ایک بیان میں کہا کہ جنگجوئوں کی نقل و حمل کے بارے میں مصدقہ اطلاع موصول ہونے پر پولیس اور فوج کی۲۹آر آر کی ایک مشترکہ ٹیم نے بس اسٹاپ چک تاپر کے نزدیک ناکہ لگا دیا۔
ترجمان نے کہا کہ اس دوران دو مشکوک افراد جو چک تاپر سے مین روڈ کریری کی طرف آ رہے تھے ، نے سیکورٹی فورسز کو دیکھتے ہی فرار ہونے کی کوشش کی تاہم دونوں کو دھر لیا گیا۔
بیان میں کہا گیا’’تلاشی کے دوران ان (گرفتار شدگان) کی تحویل سے۲ چینی ساخت کے پستول‘۲پستول میگزین‘۱۴ گولیاں‘ایک آئی ڈی کارڈ اور ایک آدھار کارڈ کی زیراکس کاپی بر آمد کی گئی‘‘۔
پولیس بیان میں گرفتار شدگان کی شناخت دائم مجید خان ولد عبدالمجید خان ساکن چک پنجی گام بانڈی پورہ اور عبیر طارق ولد طارق احمد خان ساکن وترنی پھلوان پورہ پنجی گام بانڈی پورہ کے بطور ہوئی ہے ۔
پولیس ترجمان نے کہا’’تفتیش کے دوران دونوں نے لشکر طیبہ کے ساتھ وابستہ ہونے اور ضلع میں ٹارگیٹ ہلاکتیں انجام دینے کیلئے ہتھیار جمع کرنے کا اعتراف کیا‘‘۔
پولیس نے اس سلسلے میں پولیس اسٹیشن کریری میں ایک کیس درج کرکے مزید تحقیقات شروع کی ہیں۔