سرینگر///
کشمیر چیمبر آف کامرس اینڈ انڈسٹری (کے سی سی آئی) نے آج جموں و کشمیر ٹریڈ پروموشن آرگنائزیشن (جے کے ٹی پی او) کے دفتر میں سعودی عرب میں ہندوستانی سفیر ڈاکٹر سہیل عاجز خان کے ساتھ بات چیت کی۔
تاجروں کے ایک بیان میں کہا گیا ہے کہ منیجنگ ڈائریکٹر جے کے ٹی پی او خالد جہانگیر نے اجلاس کا اہتمام کیا۔ کے سی سی آئی ٹیم کی قیادت صدر جاوید احمد ٹینگا کر رہے تھے اور اس میں سینئر نائب صدر اسحاق شانگلو، سیکرٹری جنرل فیض بخشی اور ای سی کے رکن لطیف احمد بھٹ شامل تھے۔
بیان میں کہا گیا ہے ’’ٹیم نے دستکاری، قالین، شالوں، سیاحت، کشمیر اور سعودیہ کے درمیان براہ راست فضائی رابطہ، باغبانی کی برآمدات کی مارکیٹنگ اور فروغ کے لیے مارکیٹ پروموشن نمائشوں/ میلوں/مارٹس/روڈ شوز کے انعقاد کا معاملہ اٹھایا‘‘۔
ٹیم نے بایئر سیلر میٹ/ ریورس بائیر سیلر میٹ/ بائیر ٹو بائیر میٹ/ انٹر چیمبر کی مشاورت میں بھی سفیر سے مدد طلب کی تاکہ مقامی تاجروں/ برآمد کنندگان کو کشمیر کی مصنوعات کے لیے مارکیٹ کا اندازہ ہو سکے جو سعودیہ اور خلیجی ممالک میں پہلے سے موجود ہیں۔
اس میں کہا گیا’’کے سی سی آئی نے اس ملک کے سیاحوں کو اپنی طرف متوجہ کرنے کے لیے کشمیر کی بے مثال قدرتی خوبصورتی اور زمین کی تزئین کی نمائش کے لیے سعودی سے ٹورازم ایف اے ایم ٹور کے انعقاد میں سفیر کی مدد مانگی‘‘۔
کے سی سی آئی نے سفیر کی توجہ میں یہ حقیقت دلائی کہ کشمیر سے تقریباً ۵۰ہزار عازمین عمرہ کرتے ہیں جنہیں سری نگر سے براہ راست پروازوں کی عدم موجودگی میں بالواسطہ طور پر سعودی سفر کرنا پڑتا ہے۔
کے سی سی آئی کے بیان میں مزید کہا گیا ہے’’اس معاملے کو مناسب سطح پر اٹھانے میں ان کی مدد لی گئی جس سے عازمین کو کافی راحت ملے گی۔ صدر کے سی سی آئی نے سفیر کو جدہ چیمبر آف کامرس کے ساتھ سرمایہ کاری اور اس سے منسلک معاملات کے بارے میں اپنی جاری مصروفیت کے بارے میں بتایا‘‘۔
- بیان میں کہا گیا ہے کہ سفیر نے کے سی سی آئی کی طرف سے اٹھائے گئے مسائل کو سراہا اور مقامی کاروباریوں کے مفادات کو فروغ دینے کے لیے ہندوستانی سفارت خانے اور قونصل جنرل کے تعاون اور حمایت کا یقین دلایا۔
