سکیورٹی کے سخت ترین بندو بست میں جی ۲۰ ورکنگ گروپ کا اجلاس شروع

سرینگر//
جی ٹونٹی ٹورزم ورکنگ گروپ کا تیسرا اجلاس پیر کے روز فقید المثال سیکورٹی بندوبست کے بیچ شہرہ آفاق جھیل ڈل کے کناروں اور زبرون پہاڑی سلسلے کے دامن میں واقع شیر کشمیر انترنیشنل کنوکیشن (ایس کے آئی سی سی) میں شروع ہوا۔
تین دنوں پر محیط یہ اجلاس دفعہ ۳۷۰ کی تنسیخ کے بعد جموں و کشمیر میں منعقد ہونے والا سب سے بڑا بین الاقوامی سطح کا ایونٹ ہے۔
معلوم ہوا ہے کہ منگل کے روز بھی جی ٹونٹی ممالک کے مندوبین مختلف پروگراموں میں حصہ لیں گے۔ ذرائع کے مطابق جی ٹونٹی کے دو ممالک ترکی اور سعودی عرب نے اس اجلاس میں شرکت نہیں کی تاہم ان دو ممالک کے کچھ ٹور نمائندے بات چیت میں حصہ لینے کیلئے شہر میں موجود ہیں۔
قبل ازیں جی ٹونٹی ٹورزم ورکنگ گروپ کے مندوبین کا سری نگر ہوائی اڈے پر کشمیر کے روایتی انداز میں شاندار استقبال کیا گیا۔سرکاری ذرائع نے بتایا کہ انتہائی اہمیت کے حامل اس اجلاس میں شرکت کرنے کیلئے زائد از ۷۰ مندوبین اس وقت سری نگر میں موجود ہیں جو دہلی سے دو چارٹرڈ پروازوں کے ذریعے سری نگر پہنچے۔
ایس کے آئی سی سی میں منعقد ہونے والے اس اجلاس کے حاشیہ پر فلم ٹورزم کو فروغ دینے کے مقصد سے ’ فلم ٹورزم برائے ثقافتی تحفظ اور معاشی ترقی‘ کے حوالے سے ایک ایونٹ کا اہتمام ہوا۔
اس موقع پر’نیشنل اسٹرٹیجی آن فلم ٹورزم‘ کے ڈرافٹ کی رونمائی عمل میں لائی گئی جو سیاحتی مقامات کے فروغ کیلئے فلموں کے رول کیلئے روڈ میپ فراہم کرتا ہے۔سپین، سنگا پور، نائیجریا، جنوبی افریقہ، برازیل،ماریشس اور بھارت کے مندوبین پر مشتمل ایک پینل نے فلم ٹورزم پر عالمی نقطہ نگاہ پیش کیا۔
وادی کشمیر میں منعقد ہونے والے اس سہہ روزہ اجلاس کی نگرانی کے لئے تین درجے کی سیکورٹی گرڈ کا بندوبست کیا گیا ہے اور مقام اجلاس کے گرد وپیش نیشنل سیکورٹی گارڈز (این ایس جی) اور مارکوس کمانڈوز کو تعینات کیا گیا ہے اور اس کے علاوہ فضائی نگرانی کے لئے ڈرون نصب کئے گئے ہیں۔
محکمہ ٹریفک نے ایک ایڈوائزری جاری کرکے ایس کے آئی سی سی کی طرف جانے والے روڈ پر ٹریفک کی نقل و حمل کیلئے تین دنوں تک پابندی عائد کی ہے تاہم شہر کے باقی حصوں میں ٹریفک حسب معمول جاری رہا۔
سری نگر اور وادی کے دوسرے حصوں میں بھی پیر کو جہاں بازار کھلے رہے وہیں سڑکوں پر ٹرانسپورٹ کی نقل و حمل بھی حسب معمول جاری رہی۔
۔۔۔۔۔۔۔۔۔۔۔۔۔