مرکز جلد ہی قومی سیاحتی پالیسی کا اعلان کرے گا:ریڈی

سرینگر//
مرکزی وزیر جی کشن ریڈی نے پیر کو کہا کہ مرکز جلد ہی قومی سیاحتی پالیسی کا اعلان کرے گا اور عالمی سیاحتی سرمایہ کاری سمٹ کا بھی منصوبہ بنا رہا ہے۔
ریڈی‘مرکزی وزیر جتیندر سنگھ اور ہندوستان کے جی۲۰ شرپا امیتابھ کانت کے ساتھ تین روزہ تیسرے سیاحتی ورکنگ گروپ میٹنگ کے ایک حصے کے طور پر’فلم ٹورازم فار اکنامک اینڈ کلچرل پرزرویشن‘ کے ضمنی پروگرام کے اختتام کے بعد یہاں ایس کے آئی سی سی میں ایک پریس کانفرنس سے خطاب کر رہے تھے۔
ریڈی کاکہنا تھا’’ہم جلد ہی ہندوستان کیلئے قومی سیاحتی پالیسی کا اعلان کرنے جا رہے ہیں۔ ہم عالمی سیاحتی سرمایہ کاری سمٹ کی منصوبہ بندی کر رہے ہیں‘‘۔انہوں نے کہا کہ مرکز سیاحت میں ۱۰۰ فیصد براہ راست غیر ملکی سرمایہ کاری (ایف ڈی آئی) کی اجازت دے رہا ہے۔
مرکزی وزیر نے مزید کہا کہ ہمارا خیال یہ ہے کہ نجی سرمایہ کاری کے بغیر ہم عالمی منزل نہیں بن سکتے۔
ریڈی نے کہا کہ مرکزی حکومت اور وزارت سیاحت سیاحت کی حوصلہ افزائی کے لیے تمام وزارتوں اور ریاستی حکومتوں کے ساتھ مل کر کام کر رہی ہے۔انہوں نے مزید کہا ’’حکومت ہند تمام جی۲۰ممالک کے ساتھ بھی کام کر رہی ہے اور پائیدار سیاحت کو فروغ دینے کے لیے ممالک کو مدعو کر رہی ہے‘‘۔
مرکزی وزیر نے کہا کہ جموں و کشمیر میں روحانی سیاحت کو فروغ دینے کی زبردست گنجائش موجود ہے۔
ریڈی نے کہا کہ سرینگر ہندوستان کے خوبصورت ترین شہروں میں سے ایک ہے۔’’میں میزبان منزل کی خوبصورتی اور ثقافتی ورثے کو اجاگر کرنا چاہوں گا۔ سری نگر ہندوستان کے قدیم ترین شہروں میں سے ایک ہے‘‘۔
مرکزی وزیر نے کہا کہ ہندوستان فلم سازوں کو فلموں کی شوٹنگ کے لیے ہر طرح کی جگہ فراہم کرتا ہے۔انہوں نے مزید کہا ’’سورج کے چومے ہوئے ساحلوں سے لے کر پہاڑوں تک۔جب ہم ایک دلچسپ سفر کا آغاز کرتے ہیں، ہمیں یاد رکھنا چاہیے کہ یہ نہ صرف منزل کی خوبصورتی کو ظاہر کرنا ہے بلکہ اس کی ثقافت کو بھی محفوظ رکھنا ہے‘‘۔
ریڈی نے کہا کہ ہمارا ایجنڈا بہترین طریقوں اور ٹیکنالوجی کا تبادلہ اور روزگار کی تخلیق ہے۔