جی ٹونٹی اجلاس سے جموں و کشمیر کے متعلق پھیلایا گیا پروپگنڈا ناکام ہوگا: رینا

جموں/۲۲مئی
بھارتیہ جنتا پارٹی (بی جے پی) جموںکشمیر یونٹ کے صدر ‘رویندر رینا کا کہنا ہے کہ سرینگر میں منعقد ہو رہے جی ٹونٹی اجلاس سے جموں و کشمیر کے متعلق پھیلایا گیا منفی پروپگنڈا ناکام ہوگا۔
رینا نے کہا کہ یونین ٹریٹری کے لوگ وزیر اعظم نریندر مودی کے بہت شکر گذار ہیں جنہوں نے ہمیں اس اجلاس میں شرکت کرنے والے مندوبین کو استقبال کرنے کا موقع فراہم کیا۔
یونٹ صدر نے ان باتوں کا اظہار پیر کے روز یہاں ایک پریس کانفرنس سے خطاب کے دوران کیا۔
رینا نے کہا”ہم جموں کشمیر کے لوگ وزیر اعظم نریندر مودی کے بہت ہی شکر گذار ہیں جنہوں نے ہمیں جی ٹونٹی اجلاس میں شرکت کرنے والے عالمی سطح کے مندوبین کو استقبال کرنے کا موقع فراہم کیا“۔
ان کا کہنا تھا کہ جموںکشمیر میں پہلی بار اس نوعیت کا بین الاقوامی سطح کا ایونٹ منعقد ہو رہا ہے ۔ رینا نے کہا کہ جی ٹونٹی میں دنیا کے طاقتور ممالک شامل ہیں۔
رینانے کہا”یہ مندوبین جموں وکشمیر کی خوشحالی، خوش نما ماحول، یہاں کا بھائی چارہ خود اپنی آنکھوں سے دیکھیں گے “۔ان کا کہنا تھا”چالیس برسوں تک دنیا میں جموں وکشمیر کے متعلق منفی پروپگنڈا پھیلایا گیا ، جموں وکشمیر کو بدنام کرنے کی کوشش کی گئی وہ ساری چالبازیاں اب ناکام ہوں گی“۔
بی جے پی یونٹ صدر نے کہا”پاکستان نے یہاں خون کی ہولی کھیلی دو سری طرف پروپگنڈا کیا گیا“۔
رینانے کہا کہ اس عالمی سطح کے ایونٹ سے جموں و کشمیر کی سیاحت اور معیشت کو فروغ ملے گا اور یہاں کی ثقافت کو بھی دوام ملے گا۔انہوں نے کہا کہ آزادی کے بعد پہلی بار یہاں اتنا بڑا ایونٹ منعقد ہو رہا ہے ۔