اننت ناگ//
جموں کشمیر کے لیفٹیننٹ گورنر(ایل جی) ‘ منوج سنہا نے کہا ہے کہ یو ٹی میں کچھ لوگوں کو امن ہضم نہیں ہو رہا ہے ۔
ایل جی نے پیر کو ڈورو، اننت ناگ میں کسان سمپرک ابھیان سے خطاب کرتے ہوئے کہا کہ کچھ لوگ جموں و کشمیر میں امن اور ترقی کو ہضم نہیں کر سکتے۔کسی کا نام لئے بغیر ایل جی کاکہنا تھا ’’کشمیر میں امن اور ترقی دیکھ کر کچھ لوگوں کے پیٹ میں درد ہوتا ہے۔ میں ان کی مدد نہیں کر سکتا‘‘ ۔
سنہا نے کہا کہ تقریباً ۵۰۰ سے۱۰۰۰ لوگوں کو حکومت کے ٹھیکے صرف سابقہ ریاست کو برباد کرنے کے لیے ملتے تھے لیکن ان کا وقت ختم ہوچکا ہے کیونکہ موجودہ انتظامیہ ہر ایک کی خدمت کرنے اور سننے کیلئے پرعزم ہے۔
ایل جی کاکہنا تھا’’ جموں و کشمیر پر حکمرانی اور بربادی کے لیے تقریباً ۵۰۰یا۱۰۰۰لوگوں نے ٹھیکے حاصل کیے تھے‘‘۔
سنہا کاکہنا تھا’’اب ان کا وقت ختم ہو گیا ہے۔ موجودہ انتظامیہ یو ٹی کے ہر ایک شہری کی بات سننے اور ان کے مسائل کو حل کرنے کیلئے پرعزم ہے۔ ہم یہاں بغیر کسی امتیاز کے جموں کشمیر کے ایک کروڑ تیس لاکھ لوگوں کی خدمت کرنے کے لئے ہیں۔
ایل جی نے کہا کہ کشمیری مصنوعات جلد ہی قومی اور بین الاقوامی منڈیوں تک پہنچ جائیں گی۔ ’’وہ وقت دور نہیں جب کسان کا بیٹا بھی کسان بننا چاہے گا جس طرح سرکاری افسر کا بیٹا افسر بننے کا خواب دیکھتا ہے‘‘۔ انہوں نے مزید کہا کہ کسانوں کو جدید راستے فراہم کیے جائیں گے تاکہ وہ بھی بڑے خواب دیکھ سکیں۔