سرینگر سے دہلی ہوائی جہاز کا کرایہ آسمان کو چھونے لگا

سرینگر//
گو ائیر کے مالیاتی بحران کی وجہ سے فضائی کرایہ آسمان کو چھو رہا ہے ۔ سرینگر سے دہلی ہوائی ٹکٹ کی قیمت ۲۶ہزارتک پہنچی ہے جو دیگر ایشیائی ممالک کے نسبت بہت زیادہ ہے ۔
اطلاعات کے مطابق گو ائیر کے مالیاتی بحران کی وجہ سے فضائی کرایہ میں غیر معمولی اضافہ ہوا ہے جس وجہ سے متعدد سیاحوں نے اب بکنگ بھی منسوخ کی ہے ۔
معلوم ہوا ہے کہ سرینگر سے دہلی ہوائی ٹکٹ کی قیمت ۲۶ہزار ہے جس وجہ سے سیاحوں کو مشکلات کا سامنا کرناپڑرہا ہے ۔
سیاحتی شعبے سے جڑے افراد کا کہنا ہے کہ حکومت کو اس حوالے سے فوری مداخلت کرنی چاہئے ۔انہوں نے بتایا کہ وادی کشمیر میں اس وقت سیاحتی سیزن پورے جوبن پر ہے اور اس دوران فضائی کرایہ میں اضافہ کی وجہ سے اس پر منفی اثرات مرتب ہو سکتے ہیں۔
ان کا مزید کہنا تھا کہ کئی سیاحوں نے کرائیوں میں اضافہ کے پیش نظر کشمیر کے بجائے دوسری ریاستوں کی سیر و تفریح پر جانے کا پروگرام بنایا۔
دریں اثنا وادی کی سیر وتفریح پر آئے سیاحوں نے بتایا کہ کرائیوں میں اچانک اضافہ سمجھ سے بالا تر ہے ۔
سیاحوں نے کہاکہ اس سے یہاں کے سیاحتی سیزن پر اثر پڑ سکتا ہے لہذا انتظامیہ کو اس میں فوری مداخلت کرنی چاہئے ۔