‘
جموں/۶ مئی
وزیر دفاع راج ناتھ سنگھ نے ہفتہ کو جموں و کشمیر کے راجوری ضلع میںتعینات فوجیوں کے ساتھ بات چیت کی اور یہ واضح پیغام دیا کہ فوجیوں کے قتل میں ملوث دہشت گردوں کا پیچھا کیا جائے گا۔
راج ناتھ سنگھ لیفٹیننٹ گورنر منوج سنہا اور آرمی چیف منوج پانڈے کے ساتھ راجوری میں فوج کے ڈویڑن ہیڈکوارٹر پہنچے۔
جنرل آفیسر کمانڈنگ ان چیف (جی او سی-ان-سی) شمالی کمان، لیفٹیننٹ جنرل اوپیندر دویدی اور فیلڈ کمانڈروں نے وزیر دفاع کو کنڈی کے جنگلات اور راجوری اور پونچھ اضلاع کے دیگر علاقوں میں دہشت گردوں کے خلاف جاری آپریشن کے بارے میں بریفنگ دی۔
ذرائع نے بتایا کہ وزیر دفاع نے اپنے دورے کے دوران یہ واضح پیغام دیا کہ فوجیوں کو ہلاک کرنے والے دہشت گردوں کو کسی بھی قیمت پرختم کیا جائیگا۔
سنگھ نے اپنے دورے کے دوران بتایا ”جموں و کشمیر میں امن و سکون کو خراب کرنے کی کوشش کرنے والے کو بخشا نہیں جائے گا“۔
راجوری سے جموں واپسی کے بعد وزیر دفاع دوپہر کو نئی دہلی کے لیے روانہ ہوئے۔
جمعہ کو کنڈی کے جنگلاتی علاقے میں دہشت گردوں نے ایلیٹ پیرا کمانڈوز سمیت پانچ فوجیوں کو ہلاک کر دیا۔
دہشت گردوں کے خلاف جاری آپریشن میں فوج نے گزشتہ روز ایک دہشت گرد کو مار گرایا جبکہ دوسرے کے زخمی ہونے کی اطلاع ہے۔