سرینگر/۶مئی
شمالی کشمیر کے ضلع بارہمولہ کے کرہامہ کنزر علاقے میں ہفتے کی صبح سکیورٹی فورسز اورملی ٹنٹوں کے درمیان تصادم آرائی کے دوران لشکر طیبہ سے وابستہ ایک جنگجو مارا گیا۔
ایس ایس پی بارہمولہ امود اشوک ناگپور نے اس جھڑپ کے بارے میں میڈیا کو بتایا کہ بارہمولہ کے سب ڈویژن ٹنگمرگ کے کرہامہ علاقے میں ایک گھر میں کچھ ملی ٹنٹ کے چھپنے کی ایک مصدقہ اطلاع موصول ہوئی جو یہاں جنگجویانہ کارروائی انجام دینے کےلئے آئے ہوئے ہیں۔
ناگپور نے کہا کہ اطلاع موصول ہونے پر فوج کی 2 آر آر، بارہمولہ پولیس اور سی آر پی ایف کی 176 بٹالین نے علاقے میں مشترکہ تلاشی آپریشن شروع کر دیا۔
ان کا کہنا تھا کہ اس دوران ایک گھر سے فوج کی تلاشی ٹیموں پر اندھا دھند فائرنگ ہوئی جس کی جوابی کارروائی کے دوران کولگام سے تعلق رکھنے والا لشکر طیبہ کا ایک جنگجو مارا گیا۔
جاں بحق جنگجو کی شناخت عابد وانی ولد محمد رفیق وانی ساکن یار ہول بابا پورہ کولگام کے بطور کی گئی جس کی تحویل سے ایک اے کے 47 رائفل بر آمد کی گئی۔انہوں نے کہا کہ اس سلسلے میں ایک کیس درج کرکے مزید تحقیقات شروع کی گئی ہیں۔
ایک سوال کے جواب میں ان کا کہنا تھا’علاقے میں چاک و چوبند بندوبست ہے اگر جنگجو یہاں کوئی کارروائی انجام دینے کےلئے آئے ہوں گے تو ان کا منہ توڑ جواب دیا جائے گا‘۔
ناگپور نے کہا’امید ہے کہ جی ٹونٹی اجلاس پر امن اور کامیابی کے ساتھ انجام دیا جائے
گا‘۔
