سرینگر//
وادی میں شب قدر کی تقریبات عقیدت و احترام کے ساتھ منائی گئیںجس دوران لوگوں نے شب خوانی اور درود اذکار کی محافل آراستہ کیں ۔
علما اور ائمہ مساجدنے شب قدر کی فضیلت اہمیت اور عظمت کو اجاگر کیا جس کے دوران عالم اسلام کی سربلندی ، ریاست میں مکمل امن وامان اور موجودہ ظلم وجبر سے نجات کیلئے خصوصی دعائیں مانگیں۔
اس موقعہ پر لاکھوں فرزندان توحید پیر کی شام سے منگل مطلع الفجر تک توبہ استغفار ، تلاوت قرآن اور دور اذکار کی مجالس میں شب بیدار رہے ۔ شب قدر کی تقریب سعید کے موقعہ پر رات بھر وادی کی مساجد و خانقاہوں میں روح پرور اجتماعات کا انعقاد ہوا جن میں لاکھوں فرزندان توحید بشمول باپردہ خواتین کی ایک بڑی تعدا دنے خشوع و خضوع کے ساتھ شرکت کی۔
اس دوران فرزندان توحید رات بھر اللہ کے حضور سربسجود رہے اوررب کائنات سے اپنے گناہوں اور خطائوں کیلئے در گذر طلب کیا۔جس کے دوران رقعت آمیز مناظر بھی دیکھنے کو ملے جبکہ بیشتر خواتین کی آنکھوں سے آنکھوں رواں تھے۔
عقیدتمندوں کی زبانوں سے جاری اللہ اکبرکے فلک شگاف ورد کی وجہ سے درگاہ حضرت بل کا پورا علاقہ رات بھر گونجتا رہا‘ جہاںرات بھر فرزندان توحید جن میں خواتین کی ایک بڑی تعداد شامل تھی نے بیدار رہ کر اسلام کی سربلندی، کفر و شرک کے خاتمے، خوشحالی اور ریاست میں امن بھائی چارے کو قائم رکھنے کے لئے دعائیں کیں۔
ادھر وادی کے دیگر اضلاع شوپیان ، پلوامہ ، اننت ناگ،کولگام ،سوپور، بانڈی پورہ ، اسلام آباد ، بڈگام، بارہمولہ اور کپوارہ میں بھی لوگوں نے شب خوانی کرنے کے دوران رات مساجد میںگذار دی۔
شب قدر کے موقعہ پر منعقد کی گئی تقریبات میں ائمہ مساجد نے تفصیل کے ساتھ فلسفہ شب قدر پر روشنی ڈالی جبکہ ان روح پرمجالس میں وادی میں امن و آشتی کیلئے خصوصی دعائیں مانگی گئیں۔
