سعودی باد شاہ کی ایرانی صدر کو ریاض آنے کی دعوت

سرینگر//
ریاض اور تہران کے درمیان سفارتی تعلقات کی بحالی پر رضامندی کے صرف ایک ہفتے بعد سعودی عرب کے شاہ سلمان بن عبدالعزیز آل سعود نے ایرانی صدر ابراہیم رئیسی کو ریاض آنے کی دعوت دی ہے۔
الجزیرہ نے ایک ایرانی اہلکار کے حوالے سے یہ خبر دی ہے۔ ایران کے ایک سینئر عہدیدار نے اس خبر کی تصدیق بھی کی ہے۔
خبر کے مطابق، رئیسی کے ڈپٹی چیف آف اسٹاف برائے سیاسی امور، محمد جمشیدی نے اتوار کو ایک ٹویٹ میں اس پیشرفت کی تصدیق کی اور کہا کہ سعودی عرب کے بادشاہ نے ایک خط کے ذریعے صدر کو دعوت نامہ بھیجا ہے۔
جمشیدی نے کہا کہ سعودی فرمانروا نے خط میں کہا کہ وہ دونوں’ برادر ممالک ‘کے درمیان دوطرفہ تعلقات کو معمول پر لانے کے حالیہ معاہدے کا خیرمقدم کرتے ہیں۔
ریاض اور تہران کے درمیان مضبوط اقتصادی اور علاقائی تعاون پر زور دیا۔ اہلکار نے کہا کہ رئیسی نے دعوت کا خیر مقدم کیا اور تعاون بڑھانے کے لیے ایران کی تیاری پر زور دیا۔
قابل ذکر ہے کہ ۱۰مارچ کو ایران اور سعودی عرب نے اپنے تعلقات منقطع ہونے کے سات سال بعد بحال کرنے کے لیے چین کی ثالثی میں ایک معاہدے کا اعلان کیا۔ جس میں دو ماہ کے اندر سفارتی تعلقات بحال کرنے اور سفارت خانے اور مشن دوبارہ کھولنے کا معاہدہ بھی شامل ہے۔
اتوار کو ہی ایران کے وزیر خارجہ حسین امیر عبداللہیان نے صحافیوں کو بتایا کہ دونوں ممالک نے وزرائے خارجہ کی سطح پر ملاقات کرنے پر اتفاق کیا ہے اور تین ممکنہ مقامات کی تجویز پیش کی ہے۔ انہوں نے نہ تو مقامات کے نام بتائے اور نہ ہی یہ بتایا کہ ملاقات کب ہو سکتی ہے۔
دونوں ممالک نے یہ بھی اعلان کیا ہے کہ وہ دو ماہ کے اندر سفارتخانے دوبارہ کھولیں گے اور تجارتی اور سکیورٹی تعلقات دوبارہ قائم کریں گے۔
الجزیرہ کی خبر کے مطابق، اس معاہدے سے توقع ہے کہ شیعہ اکثریتی ایران اور سنی مسلم اکثریتی سعودی عرب دو ماہ کے اندر اپنے سفارت خانے اور مشن دوبارہ کھولیں گے اور۲۰ سال سے زیادہ پہلے دستخط کیے گئے سکیورٹی اور اقتصادی تعاون کے معاہدوں پر عمل درآمد کریں گے۔