مغل شاہراہ پر سے برف ہٹانے کاکام شروع

سرینگر/۱۱مارچ
کشمیر کے ضلع شوپیاں کو صوبہ جموں کے ضلع پونچھ اور راجوری کے ساتھ جوڑنے والی۸۶ کلو میٹر طویل مغل شاہراہ پر برف ہٹانے کا کام شروع کیا گیا ہے۔
پی ڈبلیو ڈی محکمہ نے اس شاہراہ پر برف ہٹانے کا کام۱۰ مارچ سے شروع کیا ہے۔
محکمہ شاہراہ پر جدید ترین مشینری کا استعمال کر رہا ہے تاکہ شاہراہ پر برف ہٹانے کا کام کم وقت میں مکمل کیا جائے۔
واضح رہے کہ مغل روڈ ایک متبادل راستہ ہے جو راجوری اور پونچھ اضلاع کو وادی کشمیر اور ملک کے باقی حصوں سے ملاتا ہے۔
زیادہ تر لوگ اس سڑک کو کاروباری مقاصد کے لیے استعمال کرتے ہیں۔ حکام نے اس سڑک کو برفباری کے بعد گذشتہ برس دسمبر میں بند کر دیا تھا۔