کپوارہ میں دو منشیات فروش گرفتار، نشہ آور مواد بر آمد

سرینگر///
منشیات کے خلاف مہم کو جاری رکھتے ہوئے پولیس نے شمالی ضلع کپوارہ میں دو منشیات فروشوں کو گرفتار کرکے ان کی تحویل سے نشہ آور مواد بر آمد کیا ہے ۔
ایک پولیس ترجمان نے اپنے ایک بیان میں کہا کہ پولیس نے ایک مصدقہ اطلاع پر کارروائی کرتے ہوئے کپوارہ کے کرناہ علاقے میں جمعرات اور جمعے کی درمیانی شب دو الگ الگ واقعات میں۵۸۸ء۴کلو وزنی ہیرائن جیسے نشہ آور مواد کے پانچ پاکیٹ بر آمد کئے ۔
ترجمان نے کہا کہ پولیس اسٹیشن کرناہ میں درج پہلے کیس کے سلسلے میں تحقیقات کے دوران فاروق احمد شاہ ولد رقیب حسین شاہ ساکن پنجتارا کرناہ نامی ایک مشکوک فرد کو پوچھ تاچھ کے لئے حراست میں لیا گیا۔
بیان میں کہا گیا کہ مذکورہ شخص کے اعتراف اور انکشاف پر کپوارہ پولیس نے فوج کی ۶جے اے کے رائفلز کے ساتھ مل کر تلاشی آپریشن کے دوران ایگزیکٹیو مجسٹریٹ کی موجودگی میں اس کے گھر کے نزدیک۶۷۴ء۲کلو (بشمول پاکیٹ) وزنی ہیرائن جیسا نشہ آور مواد بر آمد کیا۔
پولیس بیان میں کہا گیا کہ مذکورہ شخص کو گرفتار کیا گیا اور اس کیس میں مزید تحقیقات جاری ہے اور مزید گرفتاریاں بھی متوقع ہیں۔
اسی نوعیت کے دوسرے کیس میں پولیس اسٹیشن کرناہ میں درج ایک کیس کے سلسلے میں تحقیقات کے دوران راجا آفتاب عرف بابو ولد راجا غلام اکبر ساکن ٹیتھوال نامی ایک مشکوک شخص کو پوچھ تاچھ کے لئے حراست میں لیا گیا۔
بیان کے مطابق مذکورہ شخص کے اعتراف اور انکشاف پر۹۱۴ء۱کلو وزنی ہیرائن جیسے نشہ آور مواد کے دو پاکیٹ ایگزیکیٹیو مجسٹریٹ کی موجودگی میں اس کے گھر کے نزدیک بر آمد کئے گئے ۔انہوں نے کہا کہ مذکورہ شخص کو گرفتار کیا گیا اور اس سلسلے میں مزید تحقیقات جاری ہے ۔
بیان میں کہا گیا کہ ابتدائی تحقیقات سے معلوم ہوا ہے کہ دونوں گرفتار شدگان بد نام منشیات اسمگلر ہیں اور انہوں نے یہ مواد سر حد پار سے حاصل کیا تھا تاکہ وہ جلدی پیسہ بھی کما سکیں اور جموں وکشمیر میں ملی ٹنسی کو بھی فروغ دے سکیں۔
پولیس بیان کے مطابق آفتاب کا بھائی ظہور، جس نے غیر قانونی طور پر سر حد پار کیا تھا اور اب پاکستان زیر قبضہ کشمیر میں ہی قیام پذیر ہے ، کے بارے میں شک ہے کہ وہی اپنے بھائی کو نشہ آور مواد سپلائی کر رہا ہے جبکہ ان کا ایک اور بھائی سال۲۰۱۸میں نگروٹی پولیس اسٹیشن میں درج منشیات کے ایک کیس کے سلسلے میں ٹرائل کا سامنا کر رہا ہے ۔
بیان کے مطابق فاروق شاہ بھی کچھ وقت سے سرحد پار مقیم ہینڈلرس کے ساتھ رابطے میں ہے ۔