جموںکشمیر میں دہائیوں پرانا امتیازی سلوک ختم :سنہا

جموں//
لیفٹیننٹ گورنر‘منوج سنہا نے کہا ہے کہ اگست ۲۰۱۹ کے بعد جموں کشمیر میں جواب دہ حکمرانی قائم کرکے امتیاز ی سلوک کو ختم کردیا گیا ہے ۔
لیفٹیننٹ گورنر نے آج جموں توی گالف کورس میں سرکاری سکولوں کے طلباء کیلئے گالف ٹریننگ اکیڈیمی کا اِفتتاح کرنے کے موقع پر خطاب میں کہا ’’ وزیر اعظم نے اگست ۲۰۱۹ ء کے بعد ایک شہری دوست، جواب دہ اور ذمہ دار حکمرانی نظام قائم کرکے جموں و کشمیر میں کئی دہائیوں پرانے امتیازی سلوک کو ختم کیا ہے۔ ہم معاشرے کے ہر فرد کو مرکزی دھارے سے جڑے ہوئے محسوس کرنے کو یقینی بنانے کے لئے انتھک کوششیں کر رہے ہیں۔‘‘
سنہا نے کہا کہ گذشتہ ایک برس میں ۱۱ہزار سرکاری عہدوں پر تقرریاں کی گئی ہیں جہاں نوجوانوں بالخصوص عام غریب اور پسماندہ گھرانوں کی لڑکیوں کو میرٹ کی بنیاد پر سرکاری ملازمتیں دی گئی ہیں۔ اُنہوں نے کہا کہ نیا حکمرانی نظام رشوت سے پاک، شفاف اور جامع ترقی پر یقین رکھتا ہے۔
لیفٹیننٹ گورنر نے کہا کہ جموں وکشمیر کھیلوں کی صلاحیتوں کا ایک پاور ہائوس ہے اور جموںوکشمیر یوٹی اِنتظامیہ کوچنگ کو آگے بڑھانے کے لئے مواقع اور وسائل دونوں فراہم کرنے کے لئے پُر عزم ہے۔
سنہا نے اِس بات پر دیا کہ کھیل معاشرے کے لوگوں کو جوڑتا ہے۔اُنہوں نے کہا کہ جموں توی گالف کورس میں شروع کی گئی گالف اکیڈمی اسی جذبے کی علامت ہے۔
لیفٹیننٹ گورنر نے کہاکہ ہماری کوشش ہے کہ جموںوکشمیر یوٹی آنے والے دنوں میں ملک کے سرفہرست گولفنگ مقامات میں سے ایک کے طور پر اُبھرے۔
لیفٹیننٹ گورنر نے کہا کہ ایک پروفیشنل گالف ٹور آف اِنڈیا (پی جی ٹی آئی ) ایونٹ کا سرینگر میں اِنعقاد کیا گیا تھا اور اب اسی طرح کا ٹورنامنٹ جموں میں بھی منعقد کیا جائے گا۔ مزید برآں سناسر گالف کورس کو بھی بہتر بنایا جائے گا۔
لیفٹیننٹ گورنر نے کہا کہ کھیل بنیادی ڈھانچے کی ترقی ، جموںوکشمیر یوٹی کے ہر جگہ کھیل مقابلوں کا اِنعقاد، بہترین کوچز کا اِنتظام ، مسلسل نگرانی او رموجودہ اثاثوں کا مکمل اِستعمال وہ وسیع حکمت عملی ہیں جن پر جموںوکشمیر یوٹی اِنتظامیہ گذشتہ ڈیڑھ برس سے مکمل طور پر کام کر رہی ہے۔
سنہانے کہا کہ اِس برس تمام ۲۰؍اَضلاع میں ۲۲۱کھیل میدان تعمیر کئے جائیں گے ۔ اِس کے علاوہ ۱۵۷سپورٹ کورٹس کی تعمیر اور اَپ گریڈیشن مکمل کی جائے گی۔
لیفٹیننٹ گورنر نے کہا کہ اِنتظامیہ نے نوجوانوں او رطلباء میں گالف کو مقبول بنانے کیلئے کشمیر گالف کورس سرینگر میں پہلے ایک گالف اکیڈیمی قائم کی ہے اور اب ایک برس کے اَندر ۱۰۰بچوں کی پہلی بیچ جموں توی گالف کورس میں اَپنی بنیادی تربیت شروع کر رہی ہے اور۱۵دِنوں کے بعد اِس ٹریننگ کامرحلہ دوم شروع ہوجائے گا۔ اُنہوں نے مزید کہا کہ مختلف اَضلاع میں قائم سرکاری سکولوں کے مزید طلباء کو گالف کی تربیت فراہم کی جائے گی۔
اِس موقعہ پر لیفٹیننٹ گورنر نے بچوں میں گالف کی بنیادی سکلز کے بارے میں ہینڈ بُک بھی تقسیم کی۔