راہل گاندھی جموں کشمیر میں تفرقہ انگیز ایجنڈا پھیلا رہے ہیں:چگ

سرینگر//
بی جے پی کے قومی جنرل سکریٹری ترون چْگ نے ہفتہ کو الزام لگایا کہ راہل گاندھی جموں و کشمیر میں تفرقہ انگیز ایجنڈا پھیلا رہے ہیں۔
چْگ نے کہا کہ راہول گاندھی مودی حکومت کی طرف سے کئے گئے ترقیاتی کاموں سے ناراض ہیں اور آئی ایس آئی کی زبان بولنے کی کوشش کر رہے ہیں۔
بی جے پی لیڈر نے کہا’’یہ وقت ہے کہ راہول گاندھی کو یہ احساس ہو کہ جموں کشمیر دہشت گردی سے سیاحت کی طرف بڑھ گیا ہے۔ لوگ ایک نئی زندگی جینا چاہتے ہیں‘‘۔
چگ کاکہنا تھا’’مفتیوں اور عبداللہ ہوں کے ساتھ کانگریس نے جموں و کشمیر کے ساتھ کافی تباہی مچائی ہے۔ ان سب نے جموں و کشمیر کو دہشت گردی کا دارالحکومت بنا دیا ہے۔ بی جے پی نے لوگوں کو ایک نیا وڑن اور امید دی ہے‘‘۔
بی جے پی لیڈر نے کہا کہ جموں کشمیر کے لوگوں نے وزیر اعظم نریندر مودی کے ترقی اور خوشحالی کے ایجنڈے کے حق میں اپنا مینڈیٹ دیا ہے۔انہوں نے مزید کہا ’’راہل گاندھی کو اسے سمجھنا چاہیے۔‘‘