جھیل ولر کے ارد گرد نان موٹریبل واک وے تعمیر کیا جائے گا:پولے

سرینگر//
صوبائی کمشنر کشمیر پی کے پولے کا کہنا ہے کہ شمالی کشمیر کے ضلع بانڈی پورہ میں واقع ایشیا کے سب سے بڑے ولر جھیل کی خوبصورتی میں مزید چار چاند لگانے کیلئے اس کے ارد گرد نان موٹر ایبل واک وے تعمیر کیا جائے گا۔انہوں نے کہا کہ جھیل ولر اڑیسہ کے مشہور چلیکا جھیل سے بھی بعض لحاظ سے زیادہ خوبصورت ہے ۔
صوبائی کمشنر نے ان باتوں کا اظہار۲۶آسام رائفلز کی ولر بٹالین اور ضلع انتظامیہ بانڈی پورہ کی طرف سے منعقدہ ‘ولر فسٹیول’ کے حاشیہ پر نامہ نگاروں کے ساتھ بات کرنے کے دوران کیا۔
پولے نے کہا’’ولر جھیل کے ارد گرد نان موٹر یبل واک وے تعمیر کیا جائے گا تاکہ زیادہ سے زیادہ اس کی طرف راغب ہوسکیں‘‘۔
صوبائی کمشنران کا کہنا تھا’’اڑیسہ کا جھیل چلیکا سیاحت کیلئے دنیا میں مشہور ہے لیکن جھیل ولرحیاتیاتی تنوع اور دیگر قدرتی وسائل کے لحاظ سے اس سے زیادہ خوبصورت ہے ‘‘۔
پولے نے کہا کہ ولر جھیل میں لوگوں کی سماجی و اقتصادی حالت تبدیل کرنے کی صلاحیت ہے ۔انہوں نے کہا کہ دسمبر۲۰۱۹کے بعد وادی میں سیاحوں کی آمد میں غیر معمولی اضافہ درج ہوا۔
ان کا کہنا تھا کہ سال رواں کے دوران اب تک قریب پچیس لاکھ سیاحوں نے جموں و کشمیر کے سیاحتی مقامات کی سیر کی۔