سری نگر؍۱۹ ستمبر
حکمران نیشنل کانفرنس نے آئندہ اسمبلی اجلاس میں اپوزیشن کا سامنا کرنے کے لیے حکمت عملی مرتب کرنے کی غرض سے اتوار کو اپنی لیجسلیچر پارٹی کا اجلاس طلب کیا ہے۔
جموں و کشمیر قانون ساز اسمبلی کا خزاں اجلاس۲۱ ستمبر سے شروع ہو رہا ہے۔
نیشنل کانفرنس کے ارکان اسمبلی اور حکومت کی حمایت کرنے والے آزاد ارکان کا اجلاس کل شام۴ بج کر۳۰ منٹ پر سری نگر کے بینکوئٹ ہال میں منعقد ہوگا۔
اجلاس کی صدارت جموں و کشمیر نیشنل کانفرنس کے صدر ڈاکٹر فاروق عبداللہ کریں گے، جبکہ جموں و کشمیر کے وزیر اعلیٰ اور لیجسلیچر پارٹی کے قائد عمر عبداللہ بھی اجلاس میں موجود ہوں گے۔
پارٹی نے نیشنل کانفرنس سے وابستہ تمام ارکان اسمبلی اور حکومت کی حمایت کرنے والے آزاد ارکان کو اجلاس میں شرکت کی ہدایت دی ہے۔
قانون ساز اسمبلی کا خزاں اجلاس۲۱ سے۳۰ ستمبر تک سری نگر میں منعقد ہونا ہے۔ سرکاری قانون ساز اسمبلی پورٹل کے مطابق موجودہ ایوان میں نیشنل کانفرنس کے۴۱‘ بی جے پی کے۲۹ ، آزاد ارکان کے۷ ، کانگریس کے۶ ، پی ڈی پی کے۴ ، پیپلز کانفرنس، سی پی آئی (ایم) اور عام آدمی پارٹی کا ایک ایک رکن شامل ہے۔
اپوزیشن جماعتوں نے اجلاس کے دوران مختلف حکومتی اور عوامی مسائل اٹھانے کا اعلان کیا ہے، جن میں بے روزگاری، ملازمتوں کی آؤٹ سورسنگ اور انتخابی وعدوں سمیت دیگر امور شامل ہیں۔
۔۔۔۔۔۔۔(ایجنسیاں )
