وردی ذمہ داری کی علامت ہے ، خطرات بھی ہوتے ہیں: پربھات

سری نگر؍۱۸ ستمبر

                جموں و کشمیر پولیس کے ڈائریکٹر جنرل آف پولیس (ڈی جی پی) نلن پربھات نے جموں و کشمیر پولیس (گزٹڈ) سروسز کے لیے حال ہی میں منتخب کیے گئے امیدواروں کو مبارکباد دیتے ہوئے کہا کہ پولیس کی وردی پہننا ایک بہت بڑی ذمہ داری ہے اور اس کے ساتھ متعدد چیلنجز بھی وابستہ ہوتے ہیں، جن میں جان کو لاحق خطرات بھی شامل ہیں۔

                سری نگر کے لوک بھون میں منعقدہ ایک تقریب کے موقع پر نومنتخب امیدواروں سے خطاب کرتے ہوئے ڈی جی پی پربھات نے کہا کہ یہ دن امیدواروں اور ان کے اہل خانہ کے لیے خوشی کا موقع ہے۔

                ڈی جی پی نے کہا، ’’آج آپ اور آپ کے خاندانوں کے لیے خوشی کا دن ہے۔ تاہم آپ کو یہ بھی سمجھنا چاہیے کہ وردی پہننا آسان نہیں ہے۔ اس کے ساتھ ذمہ داری بھی آتی ہے۔‘‘

                پربھات نے کہا کہ دورانِ ملازمت امیدواروں کو مختلف چیلنجز کا سامنا کرنا پڑے گا اور بعض ایسے حالات بھی پیش آسکتے ہیں جہاں ان کی جان کو خطرہ لاحق ہو۔ پربھات نے کہا، ’’اس ذمہ داری کے ساتھ چیلنجز بھی ہوں گے اور آپ کی جان کو خطرہ بھی ہوسکتا ہے۔ لیکن مجھے امید ہے کہ تربیت کے دوران آپ کو ہر صورتحال کا سامنا کرنے کے لیے اس قدر مضبوط بنایا جائے گا کہ آپ کسی بھی مشکل کا مقابلہ کرسکیں۔‘‘

                ڈی جی پی نے کہا کہ تربیت نومنتخب افسران کو پولیس سروس کے تقاضوں کو پورا کرنے اور اپنے فرائض لگن کے ساتھ انجام دینے کے لیے درکار مہارت اور اعتماد فراہم کرے گی۔

انہوں نے کہا، ’’جب آپ اکیڈمی آئیں گے تو میں آپ سے تفصیل سے بات کروں گا اور ذاتی طور پر آپ کے ساتھ بات چیت بھی کروں گا۔‘‘

                ڈی جی پی نلن پربھات نے نومنتخب افسران کو مبارکباد دی اور جموں و کشمیر پولیس میں اپنے کیریئر کا آغاز کرنے پر ان کے لیے کامیابی کی نیک خواہشات کا اظہار کیا۔

۔۔۔(ایجنسیاں )