سری نگر؍۱۱ ستمبر
اینٹی کرپشن بیورو (اے سی بی) نے جمعہ کو بڈگام ضلع کے وتر ہیل علاقے میں ایک پٹواری کو مبینہ طور پر۱۰ ہزار روپے رشوت طلب کرنے اور قبول کرنے کے الزام میں رنگے ہاتھوں گرفتار کر لیا۔
اے سی بی کے ترجمان کے مطابق گرفتار پٹواری کی شناخت بشیر احمد ڈار، پٹواری حلقہ گنڈ علی نائیک، وترہیل، تحصیل خانصاحب، بڈگام کے طور پر ہوئی ہے۔
ترجمان نے بتایا کہ اے سی بی کو ایک تحریری شکایت موصول ہوئی تھی، جس میں الزام لگایا گیا تھا کہ متعلقہ پٹواری نے فرد (ریونیو ایکسٹریکٹ) جاری کرنے کے لیے شکایت کنندہ سے غیر قانونی رقم کا مطالبہ کیا۔
شکایت کنندہ، جو گنڈ علی نائیک وتر ہیل، تحصیل خانصاحب کا رہائشی ہے، نے اپنے بزرگ دادا کی جانب سے ۲۱ولائی۲۰۲۶ کو فرد کے اجرا کے لیے آن لائن درخواست دی تھی، کیونکہ اس کے دادا عمر رسیدہ ہونے کے باعث معاملہ خود آگے بڑھانے سے قاصر تھے۔
اے سی بی کے مطابق درخواست جمع کرانے کے بعد شکایت کنندہ نے متعلقہ پٹواری سے درخواست کی پیش رفت کے بارے میں معلومات حاصل کیں۔ پٹواری نے ابتدا میں اسے بتایا کہ محکمہ مال کا آن لائن پورٹل کام نہیں کر رہا اور کچھ وقت بعد دوبارہ آنے کو کہا۔
ترجمان نے بتایا کہ بعد میں بھی شکایت کنندہ کئی مرتبہ پٹواری خانے گیا، تاہم مبینہ طور پر مختلف بہانے بنا کر معاملہ موخر کیا جاتا رہا۔ بالآخر پٹواری نے فرد جاری کرنے کے عوض۱۲ ہزار روپے رشوت طلب کی، جو گفت و شنید کے بعد۱۰ ہزار روپے میں طے ہوئی۔
شکایت کنندہ رشوت دینے پر آمادہ نہیں تھا، چنانچہ اس نے اے سی بی سے رابطہ کرکے تحریری شکایت درج کرائی۔
ترجمان کے مطابق شکایت موصول ہونے کے بعد اے سی بی نے الزامات کی تصدیق کے لیے جانچ کی، جس سے بادی النظر میں غیر قانونی رقم طلب کیے جانے کا الزام درست ثابت ہوا۔
اس کے بعد پریوینشن آف کرپشن ایکٹ،۱۹۸۸ کی دفعہ۷ کے تحت ایک ایف آئی آر درج کرکے کیس کی تحقیقات شروع کی گئی۔
اے سی بی نے کارروائی کے لیے ایک ٹریپ ٹیم تشکیل دی۔ کارروائی کے دوران مذکورہ پٹواری کو شکایت کنندہ سے۱۰ ہزار روپے رشوت طلب کرتے اور وصول کرتے ہوئے رنگے ہاتھوں گرفتار کر لیا گیا۔اے سی بی ترجمان نے بتایا کہ رشوت کی رقم آزاد گواہوں کی موجودگی میں ملزم کے قبضے سے برآمد کر لی گئی اور اسے قانون کے مطابق حراست میں لے لیا گیا۔
کیس کی مزید تحقیقات جاری ہے۔
۔۔۔۔۔۔(ایجنسیاں )
