ملک و بیرون ملک تعلیمی چھٹی کے دوران اسکالرشپ، بھتہ کوچھٹی کی تنخواہ میں ایڈجسٹ کیا جائے گا: ڈی او پی ٹی

نئی دہلی، 10 ستمبر (یو این آئی) مرکزی حکومت نے واضح کیا ہے کہ تعلیمی چھٹی کے دوران اسکالرشپ، وظیفہ یا جزوقتی روزگار سے معاوضہ حاصل کرنے والے مرکزی سرکاری ملازمین کی ایسی تمام رقم کو انہیں واجب الاداچھٹی کی تنخواہ میں ایڈجسٹ کیا جائے گا، چاہے وہ اپنی تعلیم ہندوستان میں حاصل کر رہے ہوں یا بیرون ملک۔
عملہ اور تربیتی شعبہ (ڈی او پی ٹی) نے سینٹرل سول سروسز (لیو) رولز، 1972 کے رول 56(4) کے نافذ ہونے کی صورتحال واضح کر دی ہے۔ اس سے یہ الجھن دور ہو گئی ہے کہ کیا اس قانون میں ملک کے اندر لی گئی تعلیمی چھٹی بھی شامل ہے۔ آٹھ ستمبر کے ایک دفتر کے میمورنڈم میں ڈی او پی ٹی نے کہا کہ اس کے لیو اینڈ الاؤنس ڈیپارٹمنٹ سے ملنے والی وضاحت کی بنیاد پر اس معاملے کی جانچ کی گئی ہے۔
دفتر کے میمورنڈم میں واضح کیا گیا ہے کہ سیکشن 56(4) میں درج ضابطے ، جزوقتی روزگار کے سلسلے میں اسکالرشپ/وظیفہ/معاوضے کے طور پر حاصل کردہ رقم کو واجب الادا چھٹی کی تنخواہ میں ایڈجسٹ کرنے کے حوالے سے، ملک اور بیرون ملک دونوں جگہوں پر لی گئی تعلیمی چھٹی پر نافذ ہوتے ہیں۔