سرینگر/۹ستمبر
ڈاکٹر جسٹس پشپیندر سنگھ بھاٹی نے بدھ کے روز سری نگر میں ایس کے یو اے ایس ٹی میں منعقدہ ایک پروقار تقریب میں جموں و کشمیر و لداخ ہائی کورٹ کے۳۹ ویں چیف جسٹس کی حیثیت سے حلف اٹھا لیا۔
ڈاکٹر جسٹس بھاٹی کو عہدے اور رازداری کا حلف لداخ کے لیفٹیننٹ گورنر اور جموں و کشمیر کے اضافی چارج کے حامل ونے کمار سکسینہ نے دلایا۔ تقریب کی کارروائی لداخ کے لیفٹیننٹ گورنر کے سیکریٹری ششانک الا نے انجام دی، جبکہ چیف جسٹس کی تقرری سے متعلق وارنٹ ہائی کورٹ آف جموں و کشمیر و لداخ کے رجسٹرار جنرل ایم کے شرما نے پڑھ کر سنایا۔
تقریب میں جموں و کشمیر کے وزیر اعلیٰ، جموں و کشمیر و لداخ ہائی کورٹ کے جج صاحبان اور ان کی اہلیہ و شوہروں، قانون ساز اسمبلی کے اسپیکر، کابینہ وزرا، ارکان پارلیمنٹ، جموں و کشمیر کے وزیر اعلیٰ کے مشیر، جموں و کشمیر وقف بورڈ کی چیئرپرسن، ریاستی الیکشن کمشنر، ہائی کورٹ کے سابق چیف جسٹس صاحبان اور جج صاحبان کے علاوہ عدلیہ، بار، سول و پولیس انتظامیہ اور تعلیمی شعبے سے وابستہ ممتاز شخصیات نے شرکت کی۔
ملک کی مختلف ہائی کورٹس، بالخصوص راجستھان ہائی کورٹ کے موجودہ اور سابق چیف جسٹس صاحبان اور جج صاحبان کی بڑی تعداد بھی تقریب میں موجود تھی۔ اس کے علاوہ دہلی، پنجاب، ہریانہ اور الہ آباد ہائی کورٹس سے وابستہ جج صاحبان نے بھی شرکت کی۔
راجستھان ہائی کورٹ کی جج ڈاکٹر جسٹس نوپور بھاٹی، جو چیف جسٹس کی اہلیہ بھی ہیں، ان کے والدین، قریبی رشتہ داروں اور دیگر اہل خانہ کی موجودگی نے تقریب کو مزید خصوصی بنا دیا۔
راجستھان سے تعلق رکھنے والے سینئر وکلا، سرکاری وکلا اور بار کے دیگر ارکان کے علاوہ ہائی کورٹ کے عملے اور دیگر معزز مہمانوں کی بھی بڑی تعداد تقریب میں شریک ہوئی۔
وزارت قانون و انصاف، حکومت ہند نے۵ ستمبر۲۰۲۶ کو ڈاکٹر جسٹس پشپیندر سنگھ بھاٹی کو جموں و کشمیر و لداخ ہائی کورٹ کا چیف جسٹس مقرر کیے جانے سے متعلق نوٹیفکیشن جاری کیا تھا۔
ڈاکٹر جسٹس پشپیندر سنگھ بھاٹی۲۱ ستمبر۱۹۷۰ کو پیدا ہوئے۔ انہوں نے۱۹۹۲ میں وکالت کے شعبے میں قدم رکھا اور بنیادی طور پر راجستھان ہائی کورٹ، جودھپور میں پریکٹس کی۔ انہیں آئینی اور رِٹ دائرۂ اختیار، سروس معاملات، مفاد عامہ کی عرضیاں، انتخابات، ریونیو، کان کنی، تعلیم، پنچایتی راج، عائلی اور فوجداری قوانین سمیت قانون کے مختلف شعبوں میں وسیع تجربہ حاصل ہے۔
راجستھان ہائی کورٹ کے جج کے طور پر۱۶ نومبر۲۰۱۶ کو ترقی پانے سے قبل ڈاکٹر جسٹس بھاٹی۱۳ ؍ اکتوبر۲۰۰۸ سے۲۹ دسمبر۲۰۰۸تک اور پھر۶ جنوری۲۰۱۴ سے ریاست راجستھان کے ایڈیشنل ایڈووکیٹ جنرل کے طور پر خدمات انجام دے چکے ہیں۔
اپنے شاندار وکالتی کیریئر کے دوران ڈاکٹر جسٹس بھاٹی۲۰۰۹ سے۲۰۱۵ تک بار کونسل آف راجستھان کے رکن منتخب ہوئے۔ انہوں نے۲۰۱۱ سے۲۰۱۳تک راجستھان ہائی کورٹ لائرز ایسوسی ایشن کے صدر اور۲۰۰۱ میں راجستھان ہائی کورٹ ایڈووکیٹس ایسوسی ایشن کے جنرل سیکریٹری کی حیثیت سے بھی خدمات انجام دیں۔
ڈاکٹر جسٹس بھاٹی نے بی اے، ایل ایل بی اور ایل ایل ایم (مرکنٹائل لا) کی ڈگریاں حاصل کی ہیں، جبکہ وہ پی ایچ ڈی بھی ہیں۔ انہوں نے۱۹۹۷ سے۲۰۱۶ تک۱۹ برس جے نرائن ویاس یونیورسٹی، جودھپور کی فیکلٹی آف لا میں وزٹنگ فیکلٹی کے طور پر خدمات انجام دیں۔ اس کے علاوہ وہ ایک سال تک نیشنل لا یونیورسٹی، جودھپور میں بھی وزٹنگ فیکلٹی رہے۔
وہ انڈین لا انسٹی ٹیوٹ کے راجستھان چیپٹر کی ایگزیکٹو کمیٹی کے رکن بھی ہیں۔
۔۔۔۔۔(ڈی آئی پی آر)
