ہندوستانی خواتین کی ہاکی ٹیم کی توجہ بہترین کارکردگی پر مرکوز

نئی دہلی، 15 اگست (یواین آئی) ایف آئی ایچ ہاکی ورلڈ کپ 2026 میں ہندوستانی خواتین کی ٹیم تجربے، نوجوان جوش اور نئے اعتماد کے ساتھ میدان میں اترے گی۔ ہندوستان کا پول ڈی میں پہلا مقابلہ اتوار کو چین کے خلاف ہوگا۔ ٹیم کی نظریں ورلڈ کپ میں اپنی بہترین کارکردگی پیش کرنے پر مرکوز ہیں۔
ورلڈ کپ میں ہندوستان کی اب تک کی بہترین کارکردگی پہلے ہی ایڈیشن میں سامنے آئی تھی، جب 1974 میں فرانس میں ہونے والے ٹورنامنٹ میں ٹیم چوتھے مقام پر رہی تھی۔ پانچ دہائیوں سے زائد عرصے بعد ہندوستانی ٹیم اپنی شاندار ہاکی روایت کو آگے بڑھاتے ہوئے ایک اور یادگار باب رقم کرنے کے ارادے سے اترے گی۔
ٹیم کی قیادت سلیمہ ٹیٹے کریں گی، جو اپنا دوسرا ورلڈ کپ کھیل رہی ہیں۔ انہیں تجربہ کار کھلاڑیوں سویتہ، نونیت کور، نہا، نکی پردھان، لالریمسیامی اور سوشیلا کا ساتھ حاصل ہوگا۔ ہندوستانی ٹیم میں شامل پانچ کھلاڑی 200 یا اس سے زیادہ سینئر بین الاقوامی میچ کھیل چکی ہیں، جو اس کے تجربے کی گہرائی کو ظاہر کرتا ہے۔
گول کیپر سویتہ 313 سینئر بین الاقوامی میچوں کے ساتھ ورلڈ کپ میں حصہ لینے والی تمام ٹیموں کی سب سے زیادہ تجربہ کار کھلاڑی ہیں۔ وہ ہندوستان کی سب سے زیادہ میچ کھیلنے والی خاتون ہاکی کھلاڑی وندنا کٹاریہ کے 320 میچوں کے ریکارڈ سے صرف سات میچ دور ہیں۔ سویتہ، نہا، نکی پردھان، نونیت کور اور لالریمسیامی اپنا تیسرا ورلڈ کپ کھیلیں گی۔
چیف کوچ شُوارڈ مارین کی واپسی نے بھی ٹیم کی تیاریوں کو مزید مضبوط کیا ہے۔ ان کی کوچنگ میں ہندوستان نے رواں سال ایف آئی ایچ نیشنز کپ جیتا، جس سے ورلڈ کپ سے قبل ٹیم کا حوصلہ بڑھا اور پرو لیگ میں واپسی بھی یقینی ہوئی۔ ہندوستان نے حیدرآباد میں ورلڈ کپ کوالیفائر میں رنر اپ رہ کر عالمی کپ میں جگہ حاصل کی ہے۔
ہندوستان پول ڈی میں چین، انگلینڈ اور جنوبی افریقہ کے ساتھ ہے۔ ٹیم 16 اگست کو چین کے خلاف مہم شروع کرے گی، اس کے بعد 18 اگست کو جنوبی افریقہ اور 20 اگست کو انگلینڈ سے مقابلہ ہوگا۔
مارین نے کہا کہ فی الحال پوری توجہ چین کے خلاف پہلے میچ پر ہے اور ابتدائی مقصد پول میں ٹاپ دو میں جگہ بنانا اور اگلے مرحلے میں پہنچنا ہے۔
2026 کے ورلڈ کپ میں روایتی کوارٹر فائنل مرحلہ نہیں ہوگا۔ ابتدائی مرحلے میں ہر پول کی ٹاپ دو ٹیمیں اگلے مرحلے میں پہنچیں گی، جہاں پول ای اور ایف کی سرفہرست دو، دو ٹیمیں سیمی فائنل کے لیے کوالیفائی کریں گی۔
ہندوستانی ٹیم میں 11 کھلاڑی پہلی بار ورلڈ کپ کھیلیں گی۔ 18 سالہ ساکشی رانا ٹیم کی سب سے کم عمر کھلاڑی ہیں، جبکہ 19 سالہ سنیلتا ٹوپو بھی پہلی مرتبہ عالمی سطح پر کھیلنے کے لیے تیار ہیں۔ نیشنز کپ میں مشترکہ ٹاپ اسکورر رہنے والی دیپیکا سے ہندوستان کو حملے میں اہم کردار کی امید ہے۔
مارین نے کہا کہ ٹیم میں تجربہ کار اور نوجوان کھلاڑیوں کے درمیان توازن بہت اہم ہے، کیونکہ سینئر کھلاڑی عالمی کپ کے دباؤ سے نمٹنے میں جونیئرز کی رہنمائی کرسکتے ہیں۔
تجربہ کار کھلاڑیوں، ابھرتی ہوئی صلاحیتوں اور مارین کی واپسی کے امتزاج کے ساتھ ہندوستانی خواتین کی ٹیم ورلڈ کپ میں بلند عزائم اور ملکی ہاکی تاریخ میں ایک یادگار باب رقم کرنے کے ارادے سے اترے گی۔