ہرمن پریت کے دو گول، ہندوستان نے ویلز کو 3-1 سے شکست دی

ایمسٹلوین، 15 اگست (یواین آئی) ہندوستان نے ہفتہ کو نیدرلینڈز کے ایمسٹلوین میں واقع ویگنر اسٹیڈیم میں ایف آئی ایچ ہاکی ورلڈ کپ 2026 کے پول ڈی کے اپنے ابتدائی میچ میں ویلز کو 3-1 سے شکست دے کر فاتحانہ آغاز کیا۔
سنجے نے آٹھویں منٹ میں ہندوستان کا کھاتہ کھولا، جبکہ کپتان ہرمن پریت سنگھ نے 10ویں اور 43ویں منٹ میں دو گول داغے۔ ویلز کی جانب سے واحد گول سیم ویلش نے 56ویں منٹ میں کیا۔
ویلز نے شاندار آغاز کرتے ہوئے پہلے پانچ منٹ میں ہندوستانی سرکل میں دو مرتبہ داخلہ حاصل کیا، لیکن وہ کوئی واضح موقع پیدا نہیں کرسکی۔ اس کے بعد ہندوستان نے آٹھویں منٹ میں برتری حاصل کی، جب سنجے نے دوسرے پنالٹی کارنر کو ڈریگ فلک کے ذریعے گول میں تبدیل کیا۔ چند ہی منٹ بعد ہرمن پریت نے ایک اور پنالٹی کارنر پر گول کرکے ہندوستان کی برتری 2-0 کردی۔
دوسرے کوارٹر میں دونوں ٹیمیں زیادہ مؤثر موقع بنانے میں ناکام رہیں۔ ہندوستان نے گیند اور میدان پر اپنا غلبہ برقرار رکھا، لیکن پنالٹی کارنر کو گول میں تبدیل نہیں کرسکا۔ 30ویں منٹ میں بھی ہندوستان کو ایک موقع ملا، مگر وہ ضائع ہوگیا اور وقفے تک ہندوستان 2-0 سے آگے رہا۔
تیسرے کوارٹر میں ویلز نے قدرے جارحانہ انداز اپنایا اور بائیں جانب سے کچھ اچھے حملے کیے۔ اس دوران ہندوستان کو پنالٹی کارنر ملا اور ہرمن پریت نے ایک مرتبہ پھر ڈریگ فلک کے ذریعے گیند کو جال میں پہنچا کر اپنا دوسرا اور ہندوستان کا تیسرا گول کیا۔
آخری کوارٹر میں ویلز نے مسلسل حملوں کے بعد سیم ویلش کے ذریعے ایک گول واپس حاصل کیا، تاہم یہ ہندوستان کی فتح کو روکنے کے لیے کافی نہیں تھا۔
ہندوستان اب پیر کو اسی میدان پر ورلڈ کپ کے پول ڈی کے اپنے دوسرے میچ میں انگلینڈ کا سامنا کرے گا۔