آسٹریلیا 161 رنز پر 4 وکٹ گنوا کر مشکلات کا شکار

ڈارون (آسٹریلیا)، 15 اگست (یو این آئی) محمود حسن (دو وکٹ)، تائج الاسلام اور مہدی حسن معراج (ایک ایک وکٹ) کی شاندار بالنگ کی بدولت بنگلہ دیش نے پہلے ٹیسٹ میچ کے تیسرے دن ہفتہ کو اسٹمپ کے وقت تک آسٹریلیا کے 161 رنز پر چار وکٹ حاصل کر کے میچ پر اپنی گرفت مضبوط کر لی ہے۔
بنگلہ دیش کو 426 رنز کے اسکور پر روکنے کے بعد اپنی دوسری اننگز میں بلے بازی کے لیے اتری آسٹریلیا کو محمود حسن نے دوسرے ہی اوور میں جیک ویدرالڈ (صفر) کو بولڈ اؤٹ کر کے پہلا دھچکا دیا۔ 11ویں اوور میں محمود نے ٹریوس ہیڈ (17) کو بولڈ کر کے بنگلہ دیش کو دوسری کامیابی دلائی۔ اس کے بعد مارنس لابوشین اور اسٹیو اسمتھ نے اننگز کو سنبھالنے کی کوشش کی۔ 20ویں اوور میں تاج الاسلام نے لابوشین (31) کو بولڈ کر کے آسٹریلیا کو تیسرا دھچکا دیا۔ 38ویں اوور میں مہدی حسن معراج نے نصف سنچری کی طرف بڑھ رہے اسٹیو اسمتھ (44) کو اپنی ہی گیند پر آؤٹ کر کے بنگلہ دیش کی جھولی میں چوتھا وکٹ ڈال دیا۔ اسٹیو اسمتھ نے اپنی اننگز میں 88 گیندوں کا سامنا کیا اور چار چوکے لگائے۔ دن کا کھیل ختم ہونے کے وقت آسٹریلیا نے چار وکٹوں پر 161 رنز بنا لیے ہیں۔ کیمرون گرین (ناٹ آؤٹ 43) اور ایلکس کیری (ناباد 19) رنز کے ساتھ کریز پر موجود ہیں۔ دونوں بلے بازوں کے درمیان 94 گیندوں میں 39 رنز کی شراکت ہو چکی ہے۔
اس سے قبل آج یہاں جوش ہیزل ووڈ (چھ وکٹ) کی بہترین بالنگ کے دم پر آسٹریلیا نے بنگلہ دیش کی پہلی اننگز کو 426 رنز کے اسکور پر روک دیا۔ بنگلہ دیش کو آسٹریلیا کی پہلی اننگز کی بنیاد پر 228 رنز کی برتری حاصل ہو گئی۔
بنگلہ دیش نے کل کے چھ وکٹوں پر 351 رنز سے آگے کھیلنا شروع کیا۔ آج صبح کے سیشن میں ابھی اسکور میں تین رنز کا اضافہ ہوا تھا کہ ہیزل ووڈ نے حسن محمود (14) کو ایل بی ڈبلیو آؤٹ کر کے پویلین بھیج دیا۔ اس کے بعد بلے بازی کے لیے آئے تائج الاسلام نے اننگز کو سنبھالنے کی کوشش کی، لیکن ہیزل ووڈ نے انہیں بھی اپنے جال میں پھنسا کر 17 رنز پر رخصت کر دیا۔ 134ویں اوور میں ہیزل ووڈ نے مہدی حسن معراج کو وکٹ کیپر کے ہاتھوں کیچ آؤٹ کرا کے اپنا پانچویں وکٹ حاصل کیا۔ مہدی حسن معراج نے 154 گیندوں پر پانچ چوکوں اور ایک چھکے کی مدد سے 65 رنز کی اننگز کھیلی۔ اس کے چار اوورز کے بعد ہیزل ووڈ نے عبادت حسین (سات) کو آؤٹ کر کے بنگلہ دیش کی پہلی اننگز کا 426 رنز کے اسکور پر خاتمہ کر دیا۔ تاہم بنگلہ دیش کو آسٹریلیا کی پہلی اننگز کی بنیاد پر 228 رنز کی برتری مل گئی۔
آسٹریلیا کی جانب سے جوش ہیزل ووڈ نے چھ وکٹ حاصل کئے۔ مچل اسٹارک کو دو وکٹ ملے۔ نیتھن لائن اور پیٹ کمنز نے ایک ایک بلے باز کو آؤٹ کیا۔