رام بن/ ۷ ؍اگست
جموں و کشمیر کے وزیر اعلیٰ عمر عبداللہ نے کہا ہے کہ جاری عمرناتھ یاترا اور حالیہ بارشوں کے باعث پیدا ہونے والی مشکلات کے باوجود جموں۔سرینگر قومی شاہراہ پر کشمیر سے آنے والے پھلوں سے لدے ٹرکوں اور جموں سے آنے والے پٹرولیم ٹینکروں کو ترجیحی بنیادوں پر گزرنے کی اجازت دی جا رہی ہے تاکہ باغبانی کی پیداوار بروقت منڈیوں تک پہنچ سکے اور ضروری اشیا کی فراہمی متاثر نہ ہو۔
وزیر اعلیٰ نے گزشتہ ہفتے اودھم پور۔رام بن شاہراہ پر شدید بارشوں کے نتیجے میں لینڈ سلائیڈنگ سے پیدا ہونے والی صورتحال کے بعد قومی شاہراہ پر ٹریفک کی صورت حال کا جائزہ لیا۔
رام بن ضلع کے پیرا علاقے میں جموں سے سرینگر جاتے ہوئے صحافیوں سے گفتگو کرتے ہوئے عمر عبداللہ نے کہا کہ حکومت کو جاری پھلوں کے سیزن کی مکمل حساسیت کا احساس ہے اور یہ یقینی بنانے کی کوشش کی جا رہی ہے کہ باغبانوں کی محنت ضائع نہ ہو اور ان کی پیداوار وقت پر منڈیوں تک پہنچے۔
عمرعبداللہ نے کہا’’میں جانتا ہوں کہ اس وقت پھلوں کا موسم ہے۔ لوگ چاہتے ہیں کہ ان کی پیداوار خراب ہونے سے پہلے منڈیوں تک پہنچ جائے۔ اسی دوران امرناتھ یاترا بھی جاری ہے، جس کی وجہ سے شاہراہ پر بعض پابندیاں عائد ہیں۔ اس کے باوجود پھلوں سے لدے ٹرکوں کو ترجیح دی جا رہی ہے۔ جموں سے آنے والے پٹرولیم ٹینکروں کو بھی ترجیح دی جا رہی ہے تاکہ ضروری اشیا کی کوئی قلت پیدا نہ ہو‘‘۔
وزیر اعلیٰ نے کہا کہ جموں۔سرینگر قومی شاہراہ کا فی الحال کوئی متبادل موجود نہیں، اس لیے اگر بارشوں کے باعث لینڈ سلائیڈنگ یا سڑک کی بحالی کے کام کے دوران ٹریفک کو عارضی طور پر روکنا پڑے تو عوام کو صبر و تحمل کا مظاہرہ کرنا چاہیے۔
عمرعبداللہ نے کہا کہ نیشنل ہائی ویز اتھارٹی آف انڈیا (این ایچ اے آئی)، جموں و کشمیر پولیس، ٹریفک پولیس اور سول انتظامیہ شاہراہ پر ٹریفک کی روانی برقرار رکھنے اور کسی بھی رکاوٹ کی صورت میں جلد از جلد سڑک کو بحال کرنے کے لیے مسلسل کوششیں کر رہے ہیں۔
عمر عبداللہ نے بتایا کہ انہوں نے اودھم پور اور رام بن اضلاع میں قومی شاہراہ کی صورتحال کا جائزہ لیا، این ایچ اے آئی کے حکام کے ساتھ اجلاس منعقد کیے اور متاثرہ مقامات کا دورہ کرکے زمینی صورتحال کا معائنہ بھی کیا۔
امرناتھ یاترا کا ذکر کرتے ہوئے وزیر اعلیٰ نے کہا کہ یاترا خوش اسلوبی سے جاری ہے اور اب تک بڑی تعداد میں عقیدت مند مقدس گپھا کے درشن کر چکے ہیں۔انہوں نے کہا’’یہ حوصلہ افزا بات ہے کہ اس سال بڑی تعداد میں یاتری مقدس گپھا کے درشن کر چکے ہیں اور اب تک تمام یاتری بحفاظت واپس لوٹے ہیں۔ ہمیں امید ہے کہ مزید عقیدت مند آئیں گے اور اپنی یاترا کامیابی کے ساتھ مکمل کریں گے‘‘۔
۔۔۔۔۔۔
ایجنسیاں
