سرینگر/ ۷؍ اگست
جموں و کشمیر کے ضلع ادھم پور میں جمعہ کو ایک میاں بیوی اچانک آنے والے سیلابی ریلے (فلیش فلڈ) کی زد میں آ کر لاپتہ ہوگئے۔ دونوں نالہ عبور کرنے کی کوشش کر رہے تھے کہ تیز پانی کے بہاؤ نے انہیں اپنی لپیٹ میں لے لیا۔
سرکاری ذرائع کے مطابق یہ واقعہ کاگھوٹے نالہ میں پیش آیا، جہاں مقامی رہائشی بلدیو کمار(۵۸)اور ان کی اہلیہ مایا دیوی(۵۳) نالہ عبور کر رہے تھے کہ اچانک آنے والے سیلابی ریلے میں بہہ گئے۔
واقعے کے فوراً بعد پولیس نے مقامی لوگوں کی مدد سے بڑے پیمانے پر تلاش اور بچاؤ کی کارروائی شروع کی۔
خبر رساں ایجنسی کے این او کے مطابق خبر لکھے جانے تک دونوں افراد کا کوئی سراغ نہیں مل سکا تھا، تاہم ریسکیو آپریشن مسلسل جاری تھا۔
پولیس نے واقعے کا نوٹس لیتے ہوئے مزید تحقیقات بھی شروع کر دی ہے۔
اس دوان محکمۂ موسمیات نے جموں و کشمیر میں آئندہ دس دن کے دوران ایک اور بارشوں کے سلسلے کی پیش گوئی کرتے ہوئے جموں ڈویژن کے بعض اضلاع میں ۹ سے ۱۱ ؍اگست کے دوران شدید سے انتہائی شدید بارش اور اچانک سیلاب (فلیش فلڈ) آنے کا انتباہ جاری کیا ہے۔
محکمۂ موسمیات کے ایک عہدیدار نے بتایا کہ پیش گوئی کے مطابق ۷ اور ۸ اگست کو جموں و کشمیر کے بیشتر علاقوں میں ہلکی سے درمیانی درجے کی بارش اور گرج چمک کے ساتھ ایک یا دو بار بارش ہونے کا امکان ہے۔ اس دوران بعض مقامات پر مختصر وقفے کے لیے تیز بارش بھی متوقع ہے۔
محکمہ نے ۹ سے ۱۱ اگست کے دوران بیشتر مقامات پر ہلکی سے درمیانی درجے کی بارش اور گرج چمک کے ساتھ متعدد بار بارش ہونے کی پیش گوئی کی ہے۔
محکمۂ موسمیات کے مطابق اس عرصے کے دوران جموں ڈویژن کے چند اضلاع میں شدید سے انتہائی شدید بارش ہوسکتی ہے، جبکہ کشمیر ڈویژن کے بعض اضلاع میں بھی مختصر وقفوں کے لیے موسلادھار بارش کا امکان ہے۔
۱۲ سے ۱۷ اگست تک بھی موسم مکمل طور پر خشک رہنے کی توقع نہیں ہے۔ محکمہ کے مطابق اس دوران کئی مقامات پر ہلکی بارش اور گرج چمک کے امکانات برقرار رہیں گے، جبکہ بعض علاقوں میں مختصر وقفے کے لیے تیز بارش ہوسکتی ہے۔
محکمۂ موسمیات نے ۹ سے ۱۱ اگست کے لیے خصوصی ایڈوائزری جاری کرتے ہوئے خبردار کیا ہے کہ شدید سے انتہائی شدید بارش اور بعض مقامات پر موسلادھار بارش کے باعث مختلف علاقوں میں اچانک سیلابی صورتحال پیدا ہوسکتی ہے۔
محکمہ کے مطابق شدید بارشوں کے نتیجے میں حساس اور کمزور مقامات پر فلیش فلڈ، لینڈ سلائیڈنگ اور نشیبی علاقوں میں پانی جمع ہونے کا خطرہ ہے۔
محکمۂ موسمیات نے عوام کو ہدایت دی ہے کہ وہ ندی نالوں، لینڈ سلائیڈنگ کے خطرے والے علاقوں اور دیگر حساس مقامات سے دور رہیں، جبکہ متعلقہ انتظامی محکموں کو بھی ہر ممکن صورتحال سے نمٹنے کیلئے چوکس رہنے کا مشورہ دیا گیا ہے۔
۔۔۔۔
ایجنسیاں
