کشتواڑ؍۱۲ نومبر
جموں کشمیر اسمبلی میں قائد حزب اختلاف سنیل شرما نے جمعرات کو کہا کہ خطے میں دہشت گردی کی معاونت کرنے والا پرانا نیٹ ورک مکمل طور پر ختم نہیں کیا جا سکا ہے۔ انہوں نے دعویٰ کیا کہ دہشت گردی کی حمایت کرنے والے نظام کی باقیات اب بھی موجود ہیں۔ ان کا یہ بیان ضلع کشتواڑ میں لاپتہ ہونے والے دو خصوصی پولیس افسران (ایس پی اوز) کی گولیوں سے چھلنی لاشیں برآمد ہونے کے بعد سامنے آیا ہے۔
دونوں ایس پی اوز کی ہلاکت کو انتہائی افسوسناک قرار دیتے ہوئے بی جے پی رہنما سنیل شرما نے الزام لگایا کہ دہشت گردوں نے ان اہلکاروں کو اس وقت اغوا کیا جب وہ دور افتادہ علاقے ڈچھن کی ایک گھنے جنگلات والی پٹی سے گزر رہے تھے۔ انہوں نے کہا کہ اس واقعے سے ظاہر ہوتا ہے کہ دہشت گرد عناصر، اگرچہ تقریباً خاتمے کے قریب ہیں، لیکن اب بھی اپنی موجودگی کا احساس دلانے کی کوشش کر رہے ہیں۔
سنیل شرما نے کہا، ’’دیکھئے، یہ انتہائی افسوسناک واقعہ ہے۔ جموں و کشمیر میں بتدریج امن قائم ہو رہا ہے، لیکن مایوس عناصر اور دہشت گرد صرف اپنی موجودگی ظاہر کرنے کے لیے اس طرح کی کارروائیاں انجام دیتے ہیں۔
’’کل ہمارے دو ایس پی اوز دھرنا سے کیار کی طرف سفر کر رہے تھے اور ایک انتہائی گھنے جنگل سے گزر رہے تھے۔ دہشت گردوں نے انہیں اسی جنگل میں اغوا کر لیا اور اب اطلاعات کی تصدیق ہو چکی ہے کہ دونوں اہلکار شہید ہو گئے ہیں۔ ان کی لاشیں برآمد کر لی گئی ہیں۔ میں، رکن اسمبلی شگن پریہار اور ہمارے ضلعی صدر اس وقت جائے وقوعہ کی جانب روانہ ہیں تاکہ وہاں کی زمینی صورتحال کا جائزہ لے سکیں۔‘‘
شرما نے کہا کہ یہ واقعہ تشویش کا باعث ہے اور وہ کشتواڑ کی رکن اسمبلی شگن پریہار اور ضلعی صدر کے ہمراہ صورتحال کا جائزہ لینے کے لیے جائے وقوعہ کی طرف جا رہے ہیں۔انہوں نے مزید کہا، ’’یہ واضح ہے کہ وہ دہشت گرد، جو تقریباً ختم ہونے کے قریب پہنچ چکے تھے، اب بھی اپنی موجودگی کا احساس دلانے کی کوشش کر رہے ہیں۔ یہ ہمارے لیے باعث تشویش ہے۔‘‘
وادی، خصوصاً کشتواڑ میں اوور گراؤنڈ ورکرز (او جی ڈبلیوز) کے نیٹ ورک کے دوبارہ سرگرم ہونے سے متعلق سوال کے جواب میں سنیل شرما نے کہا کہ وہ اسے کسی بڑے نئے نیٹ ورک کا قیام نہیں کہیں گے، تاہم ان کے مطابق پہلے سے موجود نیٹ ورک کو مکمل طور پر ختم نہیں کیا جا سکا ہے۔
بی جے پی لیڈر نے کہا، ’’میں یہ نہیں کہوں گا کہ کوئی بڑا نیا نیٹ ورک قائم ہوا ہے بلکہ حقیقت یہ ہے کہ پرانا نیٹ ورک ابھی مکمل طور پر ختم نہیں کیا گیا ہے۔ میرا ماننا ہے کہ یہاں دہشت گردی کی حمایت کرنے والا نظام کسی نہ کسی شکل میں اب بھی موجود ہے۔ اسی وجہ سے وہ اس طرح کا واقعہ انجام دینے میں کامیاب ہوئے۔ تاہم، اس نظام کی جو بھی باقیات موجود ہیں، انہیں بھی یقینی طور پر دفن کر دیا جائے گا۔‘‘
واضح رہے کہ دو لاپتہ ایس پی اوز، جن کی شناخت۵۷ سالہ بابی چند اور۴۵ سالہ رشپال کمار کے طور پر ہوئی ہے، کی گولیوں سے چھلنی لاشیں جمعرات کی صبح برآمد کی گئیں۔ دونوں اہلکار ایک روز قبل دور افتادہ علاقے ڈچھن سے لاپتہ ہو گئے تھے۔
دونوں اہلکار ڈچھن کے کیار گاؤں میں مقامی پولیس کے اسپیشل آپریشنز گروپ (ایس او جی) کے ساتھ تعینات تھے۔ وہ بدھ کے روز اپنے کیمپ سے دھرنا-مروہ میں واقع فوجی چوکی کی طرف جاتے ہوئے لاپتہ ہو گئے تھے۔
کشتواڑ کی رکن اسمبلی شگن پریہار نے بھی دونوں اہلکاروں کی ہلاکت پر گہرے دکھ اور افسوس کا اظہار کیا۔ انہوں نے بتایا کہ دونوں اہلکاروں کی لاشیں بالترتیب صبح تقریباً۸ بجے اور۹ بجے برآمد ہوئیں۔
شگن پریہار نے کہا، ’’دو ایس پی اوز (خصوصی پولیس افسران) کی مبینہ ہلاکت کا یہ واقعہ واقعی انتہائی افسوسناک ہے۔ جنوبی خطے سے تعلق رکھنے والے ہمارے دو ایس پی اوز ہلاک ہو گئے ہیں۔ وہ گزشتہ رات سے لاپتہ تھے اور آج صبح ان کی لاشیں برآمد ہوئیں۔ ایک کی لاش صبح تقریباً۸ بجے جبکہ دوسرے کی لاش۹ بجے ملی۔ یہ انتہائی دکھ کا لمحہ ہے۔‘‘
حکام نے بتایا کہ ہلاک ہونے والے اہلکاروں کی سروس رائفلیں برآمد نہیں ہو سکی ہیں، جس سے اس واقعے میں جنگجوؤں کے ملوث ہونے کا شبہ مزید بڑھ گیا ہے۔
کولگام میں سی آر پی ایف پر فائرنگ کے بعد تلاشی کارروائی جاری
ادھر ضلع کولگام میں ایک الگ واقعے کے دوران نامعلوم موٹر سائیکل سوار حملہ آوروں کی جانب سے بدھ کے روز نوپورہ اکھرن میں قائم حفاظتی چوکی پر تعینات سی آر پی ایف اہلکاروں پر فائرنگ کے بعد جمعرات کو تقریباً۱۷ گھنٹے تک وسیع محاصرہ اور تلاشی کارروائی جاری رہی۔
اس فائرنگ میں تین سی آر پی ایف اہلکار زخمی ہو گئے تھے۔ یہ واقعہ بدھ کو دوپہر تقریباً۲ بج کر۱۵ منٹ پر پیش آیا تھا۔ حملہ آوروں نے حفاظتی اہلکاروں پر فائرنگ کرنے کے بعد موقع سے فرار اختیار کیا۔زخمی اہلکاروں کو علاج کے لیے ضلع اننت ناگ کے ایک اسپتال منتقل کیا گیا۔
(ایجنسیاں )
