سری نگر؍۱۲ نومبر
جموں و کشمیر اپنی پارٹی کے صدر سید محمد الطاف بخاری نے مرکزی حکومت سے اپیل کی ہے کہ وہ۱۹۹۰ کی دہائی کے ناسازگار حالات سے متعلق مقدمات کا سامنا کرنے والے یا جیلوں میں بند افراد کے لیے عام معافی کا اعلان کرے۔
جمعرات کو یہاں ایک پریس کانفرنس سے خطاب کرتے ہوئے انہوں نے ریزرویشن پالیسی پر نظرثانی کرنے، جموں و کشمیر بینک کی ملازمتوں میں عمر کی حد بڑھانے اور بھاری بجلی بلوں کی ادائیگی کے لیے ایمنسٹی کا اعلان کرنے کی بھی اپیل کی۔ انہوں نے کہا’’۹۰ کی دہائی میں جموں و کشمیر کے نوجوانوں کی اکثریت ان حالات کے ساتھ چلی گئی جو ملک کی سالمیت کے خلاف تھے، لیکن تب سے حالات میں کافی بہتری آئی ہے۔ جن لوگوں نے ان حالات کی شروعات کی تھی، وہ بعد میں مین اسٹریم میں آنے لگے۔ یہاں تک کہ ایک بڑے قائد کی نواسی بھی اب مین اسٹریم کا راستہ اختیار کرنے کی کوشش کر رہی ہیں۔‘‘
ان کا کہنا تھا: ’’لہٰذا ان حالات کو دیکھتے ہوئے میری وزیر اعظم اور وزیر داخلہ سے گزارش ہے کہ جن لوگوں کو اس دور کے مقدمات کا سامنا ہے یا جو جیلوں میں بند ہیں، ان کے لیے عام معافی کا اعلان کیا جائے تاکہ ان کے بچوں کو نوکریوں یا پاسپورٹ کے حصول میں دقتوں کا سامنا نہ کرنا پڑے۔‘‘ انہوں نے کہا: ’’اگر کسی کے باپ، چچا یا کسی دوسرے رشتہ دار کے خلاف مقدمہ درج ہے تو اس کے بیٹے، بھتیجے یا رشتہ دار کو پولیس ویریفکیشن نہیں ملتی، جو شاید انصاف نہیں ہے۔‘‘
بخاری نے خبردار کیا کہ اس طرح ہماری ایک نسل ملازمتوں اور دیگر مواقع سے محروم رہ سکتی ہے۔ انہوں نے کہا کہ جموں و کشمیر کے لوگوں نے امن کا راستہ اختیار کیا ہے اور اب وقت آ گیا ہے کہ ان کے جائز خدشات دور کیے جائیں۔
ریزرویشن پالیسی کا جامع جائزہ لینے کا مطالبہ کرتے ہوئے انہوں نے کہا: ’’کشمیر کی تقریباً۷۰ فیصد آبادی تقریباً صرف۳۰ فیصد ملازمتوں کے لیے اوپن میرٹ کے زمرے میں مقابلہ کر رہی ہے، جس سے کشمیر کے نوجوانوں کے لیے نوکریوں کے مواقع بہت کم ہو رہے ہیں۔‘‘ ان کا کہنا تھا: ’’اب کسی محکمے میں کوئی کشمیری ملازم مشکل سے ہی نظر آتا ہے۔ یہ پالیسی نوجوانوں کے خلاف ہے، اس کا جامع جائزہ لیا جانا چاہیے۔‘‘
انہوں نے جموں و کشمیر کی موجودہ حکومت سے کہا کہ وہ اس مسئلے پر صرف باتیں کرنے کے بجائے عملی اقدام کرے۔ ان کے مطابق: ’’مجھے لگتا ہے کہ جس طرح یہ سرکار دفعہ۳۷۰ کی واپسی کے مطالبے سے مکر گئی، یہی حال ریزرویشن پالیسی کا بھی ہو سکتا ہے۔‘‘
الطاف بخاری نے حکومت سے جموں و کشمیر میں پنچایتی اور بلدیاتی انتخابات کرانے کی اپیل کرتے ہوئے کہا: ’’حکومت کو چاہیے کہ وہ یہاں پنچایتی اور بلدیاتی انتخابات کا انعقاد جلد از جلد یقینی بنائے۔‘‘ انہوں نے کہا: ’’لوگوں کے روزمرہ کے مسائل یہی ادارے حل کرتے ہیں، لیکن میں سمجھتا ہوں کہ موجودہ سرکار یہ انتخابات کرانے کی اجازت نہیں دے گی، کیونکہ اس سے اس جماعت کے ارکان اسمبلی کو مشکلات کا سامنا کرنا پڑے گا۔‘‘
اپنی پارٹی کے صدر نے بجلی سستی کرنے اور اس کی بلا رکاوٹ فراہمی یقینی بنانے پر زور دیا۔ انہوں نے بھاری بجلی بلوں کی ادائیگی کے لیے ایمنسٹی دینے کی بھی اپیل کی۔ ساتھ ہی انہوں نے جموں و کشمیر بینک کی مختلف اسامیوں کے لیے امیدواروں کی عمر کی حد بڑھانے کا مطالبہ کیا۔ الطاف بخاری نے مرکزی حکومت سے جموں و کشمیر کا ریاستی درجہ بحال کرنے کے وعدے پر عمل کرنے کی اپیل بھی دہرائی۔
۔۔۔۔۔(ایجنسیاں )
