امتحانات کو محفوظ‘ شفاف اور جدید ٹیکنالوجی سے ہم آہنگ بنانے پر زور، کمپیوٹر پر مبنی امتحانی نظام مرحلہ وار متعارف کرانے کی تجویز
جموں؍۱۲ نومبر
جموں و کشمیر کے وزیر اعلیٰ عمر عبداللہ نے جمعرات کو مرکز کے زیر انتظام علاقے میں امتحانی نظام میں جامع اصلاحات پر زور دیتے ہوئے کہا کہ امتحانات کو محفوظ، شفاف، ٹیکنالوجی پر مبنی اور ہر قسم کی بے ضابطگی سے پاک بنایا جانا چاہیے تاکہ طلبہ کے مستقبل کا تحفظ یقینی بنایا جا سکے اور انتخاب کے عمل میں میرٹ ہی واحد معیار رہے۔
عمر عبداللہ نے یہاں سول سیکریٹریٹ میں امتحانی اصلاحات سے متعلق اعلیٰ سطحی ٹاسک فورس کے ارکان کے ساتھ ایک میٹنگ کی صدارت کرتے ہوئے ٹاسک فورس کو مکمل تعاون کا یقین دلایا۔ انہوں نے امتحانات کے تحفظ کو مزید مضبوط بنانے، بتدریج کمپیوٹر پر مبنی امتحانی نظام کی جانب منتقلی، بورڈ امتحانات کی ساکھ بہتر بنانے اور انتخابی عمل میں غیر تحریری مراحل سے متعلق خدشات دور کرنے پر زور دیا۔
وزیرا علیٰ نے مشاہدہ کیا کہ امتحانی نظام میں ٹھوس اصلاحات کی ضرورت اس وقت خاص طور پر شدت سے محسوس ہوئی جب NEET-UG امتحان منسوخ کرنے اور بعد ازاں دوبارہ امتحان منعقد کرنے کے فیصلے کے باعث ملک بھر میں لاکھوں امیدواروں کو کافی پریشانی اور ذہنی دباؤ کا سامنا کرنا پڑا۔
کمپیوٹر پر مبنی امتحانات کی جانب مرحلہ وار منتقلی کی اہمیت پر زور دیتے ہوئے انہوں نے کہا کہ اس نظام کو وسیع پیمانے پر متعارف کرانے سے قبل طلبہ کو اس ٹیکنالوجی سے مناسب طور پر واقف کرانا ضروری ہے۔
عمرعبداللہ نے اس بات کی بھی وکالت کی کہ مسابقتی اور داخلہ جاتی امتحانات کے نظام میں اسکول بورڈ کے امتحانات میں طلبہ کی کارکردگی کو شامل کرنے کے امکانات کا جائزہ لیا جائے تاکہ صرف ایک امتحان پر ضرورت سے زیادہ انحصار کم کیا جا سکے اور باقاعدہ اسکولی تعلیم کی اہمیت بحال ہو۔
اس تجویز کو عملی جامہ پہنانے کے لیے عمر عبداللہ نے ایک مناسب یکساں معیار وضع کرنے کی ضرورت پر زور دیا، جو مختلف تعلیمی بورڈوں بشمول جموں و کشمیر بورڈ آف اسکول ایجوکیشن ، سینٹرل بورڈ آف سیکنڈری ایجوکیشن اور انڈین سرٹیفکیٹ آف سیکنڈری ایجوکیشن کے طلبہ کو یکساں مواقع فراہم کرے، تاکہ کسی بھی امیدوار کو نقصان کا سامنا نہ کرنا پڑے۔
بھرتیوں اور داخلوں کے عمل میں انٹرویو اور زبانی امتحانات کے مراحل میں زیادہ شفافیت کی ضرورت کو اجاگر کرتے ہوئے وزیر اعلیٰ نے کہا کہ امیدوار اکثر ان مراحل میں موضوعی جانچ اور نمبروں میں ممکنہ ردوبدل سے متعلق خدشات ظاہر کرتے ہیں۔
وزیرا علیٰ نے ٹاسک فورس کو مشورہ دیا کہ زبانی امتحانات کو زیادہ معروضی اور جوابدہ بنانے کے لیے ضروری اقدامات کا جائزہ لیا جائے۔
اس سے قبل اعلیٰ تعلیم کے محکمے کے کمشنر سیکریٹری رام نواس شرما نے جموں و کشمیر حکومت کی جانب سے امتحانی اصلاحات کے لیے اٹھائے گئے اقدامات پر تفصیلی پیشکش دی۔
عمرعبداللہ نے جموں و کشمیر میں سرکاری امتحانات کے انعقاد کے دوران اختیار کیے گئے اہم حفاظتی انتظامات کو اجاگر کیا، جن میں امتحانی مواد کی پولیس نگرانی میں منتقلی، سی سی ٹی وی کیمروں کی نگرانی میں محفوظ کمروں میں امتحانی مواد رکھنے کا انتظام، چوبیس گھنٹے سکیورٹی، امیدواروں کی تلاشی کے لیے مقررہ طریقہ کار اور امتحانی مراکز کی مسلسل نگرانی شامل ہیں۔
میٹنگ کے دوران جموں و کشمیر پبلک سروس کمیشن ‘ جموں و کشمیر سروسز سلیکشن بورڈ ‘ یونیورسٹیوں اور دیگر اعلیٰ تعلیمی اداروں کی جانب سے نافذ کی گئی اصلاحات کا بھی جائزہ لیا گیا۔ خاص طور پر ڈیجیٹل امتحانات، شفاف جانچ، نتائج کا بروقت اعلان اور ڈگریوں کے فوری اجرا سے متعلق اقدامات زیر غور آئے۔
۔۔۔۔(ویب ڈیسک)
