سرینگر؍ ۶ ؍اگست
راشٹریہ سویم سیوک سنگھ (آر ایس ایس) کے سربراہ موہن بھاگوت نے کہا ہے کہ جنگ یا تنازع کے دوران ملک کو اپنی حکومت اور مسلح افواج کے ساتھ کھڑا ہونا چاہیے، تاہم ایسے حالات کی وجہ سے دیگر ممالک کے ساتھ موجود تعلقات کو ہمیشہ کے لیے ختم نہیں کیا جانا چاہیے۔
ممبئی میں ایک تقریب سے خطاب کرتے ہوئے موہن بھاگوت نے پاکستان اور چین کی مثال دیتے ہوئے کہا کہ تنازع کے دوران تعلقات کو وقتی طور پر معطل کیا جا سکتا ہے، لیکن انہیں مکمل طور پر منقطع نہیں کیا جانا چاہیے۔
انہوں نے کہا، ’’تنازع کے وقت ہمیں اپنی حکومت اور فوج کے فیصلوں کے ساتھ کھڑا ہونا چاہیے، لیکن اس کا مطلب یہ نہیں کہ پہلے سے موجود تعلقات ختم کر دیے جائیں۔‘‘
پاکستان اور چین کا حوالہ دیتے ہوئے انہوں نے کہا، ’’چین کے لوگ کہتے ہیں کہ بھارت نے دو ہزار برس تک ہمیں بہت سی اقدار دی ہیں، جبکہ پاکستان سو سال پہلے تک بھارت کا ہی حصہ تھا۔ اس حقیقت کو فراموش نہیں کرنا چاہیے۔‘‘
آر ایس ایس سربراہ نے مزید کہا کہ ’’یہ تعلقات ختم نہیں کیے جا سکتے، البتہ تنازع جاری رہنے تک انہیں معطل رکھا جا سکتا ہے۔‘‘
انہوں نے زور دیتے ہوئے کہا کہ بھارت کا نقطۂ نظر دوسروں کو فتح کرنا یا مٹا دینا نہیں بلکہ مکالمے اور پُرامن بقائے باہمی کو فروغ دینا ہے۔بھاگوت نے کہا، ’’بھارت کے پاس مسائل کا حل مکالمے میں ہے۔‘‘ انہوں نے مزید کہا کہ ’’انسانیت ایک ہے۔‘‘
آر ایس ایس سربراہ نے این ای ای ٹی پرچہ لیک کے خلاف نوجوانوں کی قیادت میں ہونے والے احتجاج کے تناظر میں کہا کہ جنریشن زیڈ کے احتجاج کو ملک دشمنی سے تعبیر نہیں کیا جانا چاہیے، کیونکہ ان کے تحفظات حقیقی ہیں اور ان کے ساتھ مکالمہ ضروری ہے۔
بھاگوت نے کہا، ’’اگر جنریشن زیڈ احتجاج کر رہی ہے تو وہ ملک دشمن نہیں ہے۔ وہ ہمارے اپنے بچے ہیں، ہماری آنے والی نسل ہیں۔ ان کے ساتھ اپنائیت کا رشتہ ہونا چاہیے اور ان سے بات چیت کی جانی چاہیے۔‘‘
بھاگوت نے کہا کہ طلبہ کی جانب سے اٹھائے گئے خدشات جائز ہیں۔ ’’جو کچھ ہوا ہے، اس پر ان کی شکایت حقیقی ہے۔ ہمارے تعلیمی نظام میں بہت کچھ کرنے کی ضرورت ہے، لیکن چونکہ وہ نہیں ہو رہا، اس لیے اس پر آواز اٹھائی جا رہی ہے۔‘‘
آر ایس ایس سربراہ نے احتجاج کو جمہوری عمل کا حصہ قرار دیتے ہوئے کہا کہ جب مسائل بات چیت سے حل نہ ہوں تو احتجاج بھی مکالمے کی ایک شکل بن جاتا ہے۔
بھاگوت نے کہا، ’’احتجاج بھی ایک طرح کا مکالمہ ہے۔ اگر بات چیت سے مسئلہ حل ہو جائے تو بہتر ہے، ورنہ اختلاف سامنے آتا ہے۔ اگر کوئی مسئلہ میرے یا آپ کے اختیار میں ہونے کے باوجود حل نہ ہو تو پھر آواز بلند کی جاتی ہے۔‘‘
انہوںنے اپنی نسل اور موجودہ نوجوان نسل کا تقابل کرتے ہوئے کہا کہ ان کے دور میں بزرگوں کی بات بغیر سوال کیے قبول کر لی جاتی تھی، جبکہ آج کی نسل سوال کرتی ہے اور منطقی جواب چاہتی ہے۔
بھاگوت نے کہا، ’’جب ہم جنریشن زیڈ کی عمر میں تھے تو بزرگوں کی بات مان لیتے تھے، سوال نہیں کرتے تھے، لیکن آج جنریشن زیڈ اور جنریشن الفا سوال پوچھتی ہیں اور منطقی جواب چاہتی ہیں۔‘‘
انہوں نے مزید کہا، ’’میرے خیال میں جنریشن زیڈ اور جنریشن الفا موجودہ نسل سے زیادہ دیانت دار ہیں۔ ان پر حب الوطنی اور خدمتِ وطن کی مخلصانہ اپیل مؤثر ثابت ہوتی ہے۔‘‘
اس سوال پر کہ کیا بروقت مکالمے سے صورت حال کو بگڑنے سے روکا جا سکتا تھا، موہن بھاگوت نے کہا کہ جب کوئی ایسا واقعہ پیش آتا ہے جو نہیں ہونا چاہیے تھا تو یقیناً کہیں نہ کہیں کوئی کمی رہ گئی ہوتی ہے۔انہوں نے کہا، ’’یہ کمی دور ہونی چاہیے اور نظام میں اصلاح کی جانی چاہیے۔‘‘
جمہوریت میں اختلافِ رائے کی اہمیت پر زور دیتے ہوئے انہوں نے کہا کہ انگریزی میں اسے ڈیبیٹ اور ہندوستانی روایت میں شاسترارتھ کہا جاتا ہے، جہاں مختلف آرا سامنے آتی ہیں اور ان سے حقیقت کی مکمل تصویر ابھر کر سامنے آتی ہے۔
بھاگوت نے کہا، ’’میں یہ نہیں کہوں گا کہ جنریشن زیڈ احتجاج نہ کرے، لیکن جمہوریت میں احتجاج کا بھی ایک طریقہ ہوتا ہے۔ آئین سازوں اور ڈاکٹر بابا صاحب امبیڈکر کی تقاریر میں اس حوالے سے واضح رہنمائی موجود ہے، جس کا مطالعہ کیا جانا چاہیے۔‘‘
موہن بھاگوت نے کہا کہ جنریشن زیڈ اپنی آواز اس لیے بلند کر رہی ہے کیونکہ اسے کچھ مسائل درپیش ہیں اور ان مسائل کا حل نکالا جانا چاہیے۔ ’’احتجاج کسی فرد کے خلاف نہیں بلکہ نظام کی اصلاح کے لیے ہونا چاہیے۔‘‘
نوجوان مظاہرین پر لاٹھی چارج اور پیلٹ گن کے استعمال سے متعلق سوال پر انہوں نے کوئی قطعی رائے دینے سے گریز کرتے ہوئے کہا کہ ان کے پاس اس حوالے سے مکمل معلومات موجود نہیں ہیں۔انہوں نے کہا، ’’یہ جاننے کے لیے کہ کیا ہوا اور کیوں ہوا، مکمل معلومات درکار ہیں، جو اس وقت میرے پاس نہیں ہیں۔‘‘ (ایجنسیاں)
۔۔۔۔۔۔۔۔
ویب ڈیسک
