جموں/سرینگر؍۵؍اگست
بھارتیہ جنتا پارٹی (بی جے پی) نے بدھ کے روز کہا کہ۵؍ اگست۲۰۱۹ کو آرٹیکل۳۷۰؍اور۳۵؍ اے کی منسوخی کے ساتھ جموں و کشمیر میں اتحاد، مساوات اور ترقی کے ایک نئے دور کا آغاز ہوا اور اس کے ذریعے ایک دیرینہ قومی عزم کی تکمیل ممکن ہوئی۔
یہ باتیں بی جے پی جموں و کشمیر کے ترجمانوں کے اجلاس میں کہی گئیں، جو جموں میں پارٹی ہیڈکوارٹر میں چیف ترجمان سنیل سیٹھی کی صدارت میں منعقد ہوا۔
سنیل سیٹھی نے کہا’’۵؍اگست۲۰۱۹ جموں و کشمیر میں اتحاد، مساوات اور ترقی کے ایک نئے دور کا نقطۂ آغاز ثابت ہوا‘‘۔
بی جے پی کے مطابق وزیر اعظم نریندر مودی اور مرکزی وزیر داخلہ امت شاہ کی قیادت میں لیا گیا یہ فیصلہ بھارت کے اتحاد اور سالمیت کو مزید مضبوط بنانے کا باعث بنا، جبکہ اس کے ذریعے جموں و کشمیر کا آئینی اور ترقیاتی اعتبار سے ملک کے باقی حصوں کے ساتھ مکمل انضمام بھی ممکن ہوا۔
اجلاس میں اس بات کو بھی یاد کیا گیا کہ بی جے پی کئی دہائیوں سے آرٹیکل۳۷۰؍ اور۳۵؍ اے کے خاتمے کی حامی رہی ہے۔ پارٹی کے مطابق یہ فیصلہ ’’ایک ملک، ایک آئین‘‘کے اصول سے اس کی وابستگی اور جموں و کشمیر کے تمام شہریوں کو مساوی حقوق اور یکساں مواقع فراہم کرنے کے عزم کی عکاسی کرتا ہے۔
ترجمانوں نے گزشتہ چھ برسوں کے دوران مرکزی زیر انتظام علاقے میں رونما ہونے والی مثبت تبدیلیوں کا بھی ذکر کیا، جن میں بنیادی ڈھانچے کی تیز رفتار ترقی، شفاف طرزِ حکمرانی، جمہوری اداروں کا استحکام، عوامی فلاح و بہبود میں بہتری اور مرکزی قوانین و فلاحی اسکیموں کا معاشرے کے تمام طبقات تک توسیعی نفاذ شامل ہیں۔
انہوں نے قومی مفاد میں اس فیصلے کو’جرأت مندانہ اور تاریخی قدم‘ قرار دیتے ہوئے وزیر اعظم، وزیر داخلہ اور مرکزی قیادت کا شکریہ بھی ادا کیا۔
بی جے پی نے آرٹیکل۳۷۰؍اور۳۵؍ اے کی منسوخی کی ساتویں برسی کے موقع پر جموں و کشمیر بھر میں مختلف تقریبات کا اہتمام کیا۔
سرینگر کے جواہر نگر میں واقع پارٹی دفتر میں بی جے پی جموں و کشمیر کے جنرل سیکریٹری (تنظیم) اشوک کول نے اس موقع پر کیک کاٹا۔
پارٹی کی یوتھ ونگ نے پنتھا چوک سے لال چوک تک موٹر سائیکل ریلی نکالنے کا منصوبہ بنایا تھا، تاہم پولیس نے انہیں لال چوک جانے کی اجازت نہیں دی اور ریلی کا رخ پارٹی دفتر کی طرف موڑ دیا۔
صحافیوں سے گفتگو کرتے ہوئے بی جے پی یوتھ لیڈر اور سابق ڈی ڈی سی رکن اعجاز حسین نے کہا کہ۵؍اگست جموں و کشمیر کے بھارت کے ساتھ مکمل انضمام کی علامت ہے۔انہوں نے کہا’’آج آرٹیکل۳۷۰ کی منسوخی کے سات سال مکمل ہو گئے ہیں۔ میں پورے ملک کو مبارک باد پیش کرتا ہوں۔ اسی دن جموں و کشمیر کا ملک کے ساتھ مکمل انضمام عمل میں آیا تھا‘‘۔
ادھر جنوبی کشمیر کے ضلع اننت ناگ میں بھی بی جے پی کارکنوں نے جشن کے طور پر ترنگا ریلی نکالی۔ قومی پرچم اٹھائے اور حب الوطنی کے نعرے لگاتے ہوئے بڑی تعداد میں کارکن اس جلوس میں شریک ہوئے۔
سخت حفاظتی انتظامات کے درمیان یہ ریلی شہر کے مختلف علاقوں سے گزری۔
۔۔۔۔۔۔
ایجنسیاں
