’مزید۴۸گھنٹے شدید گرمی برقرار رہے گی‘ یکم جولائی سے مانسون کی آمد متوقع‘
(ویب ڈیسک )
سرینگر؍۳۰ جون
وادی کشمیر میں شدید گرمی کی لہر مسلسل تیسرے روز بھی برقرار رہی، جبکہ پیر کے روز سری نگر میں اس موسم کا گرم ترین دن ریکارڈ کیا گیا۔ محکمہ موسمیات کے مطابق زیادہ سے زیادہ درجہ حرارت ۳۵ء۳ گری سینٹی گریڈ ریکارڈ کیا گیا۔
محکمہ موسمیات کے سری نگر مرکز کے حکام نے بتایا کہ جموں و کشمیر میں۳۰ جون تک موسم گرم اور خشک رہنے کے ساتھ ہیٹ ویو جیسی صورتحال برقرار رہنے کا امکان ہے۔
محکمہ نے خبردار کیا ہے کہ جموں خطے میں شدید سے شدید بارش ہوسکتی ہے، جس کے نتیجے میں اچانک سیلاب، لینڈ سلائیڈنگ اور مٹی کے تودے گرنے کا خطرہ ہے۔
محکمہ موسمیات کے ڈائریکٹر ڈاکٹر مختار احمد نے بتایا کہ پیر کے روز زیادہ سے زیادہ درجہ حرارت۳۸ڈگری سینٹی گریڈ تک پہنچنے کا امکان ہے، جبکہ منگل کو درجہ حرارت۳۳ء۵ سے ۳۴ ڈگری سینٹی گریڈ کے درمیان رہنے کی توقع ہے۔
احمدنے کہا، ’’آئندہ۴۸ گھنٹوں تک گرمی برقرار رہے گی۔ اگلے تقریباً۴۰گھنٹوں تک کوئی مؤثر موسمی نظام سرگرم نہیں ہے، اس لیے موسم گرم رہے گا۔‘‘
محکمہ موسمیات کے علاقائی ناظم نے کہا کہ آئندہ۷۲ گھنٹوں کے دوران جنوب مغربی مانسون جموں و کشمیر میں داخل ہونے کا امکان ہے اور بارش کا پہلا سلسلہ یکم جولائی سے شروع ہو سکتا ہے۔
احمد نے بتایا، ’’۲؍ اور۳جولائی کے دوران بالخصوص جموں خطے میں شدید سے شدید بارش متوقع ہے۔ بعض اضلاع میں مختصر وقت کے دوران انتہائی شدید بارش ہوسکتی ہے، جس سے اچانک سیلاب، لینڈ سلائیڈنگ اور مٹی کے تودے گرنے کا خطرہ پیدا ہو سکتا ہے۔‘‘
محکمہ موسمیات کے ڈائریکٹر نے نشیبی علاقوں میں پانی جمع ہونے کے خدشے سے بھی خبردار کرتے ہوئے عوام کو چوکس رہنے کی ہدایت دی۔
انہوں نے کہا کہ جنوب مغربی مانسون اس وقت اتر پردیش اور اتراکھنڈ کے کئی علاقوں تک پہنچ چکا ہے اور جموں و کشمیر میں داخل ہونے سے قبل اس کے ہماچل پردیش کے مزید علاقوں تک پیش قدمی کرنے کی توقع ہے۔
احمد نے کہا کہ آئندہ دو دنوں کے دوران وادی کشمیر میں عمومی طور پر موسم خشک اور گرم رہے گا، تاہم دوپہر کے اوقات میں چند مقامات پر ہلکی موسمی سرگرمی دیکھنے کو مل سکتی ہے۔
محکمہ موسمیات کے علاقائی ناظم نے کسانوں کو مشورہ دیا کہ وہ کھیتوں کی تیاری اور دھان کی شجرکاری کا کام جاری رکھ سکتے ہیں، تاہم متوقع بارشوں کے پیش نظر یکم جولائی سے آبپاشی سے گریز کریں۔
احمد نے مزید کہا کہ فصلوں پر ادویات کا چھڑکاؤ صرف صبح اور شام کے اوقات میں کیا جائے اور عوام سے اپیل کی کہ وہ تازہ ترین صورتحال کے لیے محکمہ موسمیات کی سرکاری موسمی بلیٹن پر نظر رکھیں۔
