افسران کو مریضوں کی نگہداشت، طبی تعلیم اور صحت خدمات میں بہتری کے لیے جدید اور اختراعی تجاویز مرتب کرنے کی ترغیب
ڈی آئی پی آر
سرینگر؍۶جون
چیف سیکریٹری اتل ڈولو نے آج ایک جامع جائزہ اجلاس کی صدارت کرتے ہوئے گزشتہ چند برسوں کے دوران جموں و کشمیر میں نافذ کی گئی صحت شعبہ اصلاحات کی پیش رفت کا تفصیلی جائزہ لیا۔
اجلاس میں تیسرے اور دوسرے درجے کی طبی خدمات کو مضبوط بنانے، طبی تعلیم میں توسیع، ڈیجیٹل صحت کے بنیادی ڈھانچے کو فروغ دینے اور یونین ٹیریٹری بھر میں خصوصی علاج معالجے کی سہولیات تک عوامی رسائی کو بہتر بنانے سے متعلق اصلاحات کا جائزہ لیا گیا۔
اجلاس میں کمشنر سیکریٹری محکمہ صحت و طبی تعلیم کے علاوہ ڈائریکٹر سکمز، منیجنگ ڈائریکٹر نیشنل ہیلتھ مشن ‘ چیف ایگزیکٹو آفیسر اسٹیٹ ہیلتھ ایجنسی‘ سرکاری میڈیکل کالجوں کے پرنسپلز، ڈائریکٹر ہیلتھ سروسز کشمیر و جموں، ایمز جموں، شری ماتا ویشنو دیوی انسٹی ٹیوٹ آف میڈیکل ایکسیلنس کے نمائندوں اور صحت شعبے سے وابستہ دیگر سینئر افسران نے شرکت کی۔
اجلاس کے دوران چیف سیکریٹری کو بتایا گیا کہ سرکاری میڈیکل کالجوں، سکمز، ایمز جموں اور دیگر طبی اداروں کے درمیان اشتراک کو فروغ دینے کے لیے مؤثر ادارہ جاتی فریم ورک قائم کیے گئے ہیں، جن کے ذریعے اسپیشلٹی اور سپر اسپیشلٹی خدمات، استعداد سازی، تعلیمی تعاون، تحقیق اور ڈیجیٹل ہیلتھ سروسز کو مضبوط بنایا جا رہا ہے۔
صحت شعبہ اصلاحات کے تحت حاصل شدہ پیش رفت کا جائزہ لیتے ہوئے چیف سیکریٹری نے کہا کہ جموں و کشمیر کے ہر تیسرے درجے کے طبی ادارے کو کریٹیکل کیئر، ٹراما کیئر اور ایمرجنسی میڈیسن خدمات کے قیام اور استحکام کے لیے سنجیدہ اقدامات کرنے چاہئیں، کیونکہ معیاری طبی خدمات کی فراہمی میں ان شعبوں کی کلیدی اہمیت ہے۔
انہوں نے مزید ہدایت دی کہ اصلاحاتی عمل کے فوائد صرف نئے قائم شدہ سرکاری میڈیکل کالجوں تک محدود نہ رہیں بلکہ ضلعی اور سب ڈسٹرکٹ اسپتالوں کو بھی اس عمل میں شامل کیا جائے، خصوصاً ان علاقوں میں جہاں میڈیکل کالج موجود نہیں ہیں، تاکہ طبی سہولیات کی ترقی پورے جموں و کشمیر میں متوازن انداز میں ہو سکے۔
اتل ڈولو نے محکمہ کو یقین دلایا کہ مؤثر اور قابلِ عمل طبی منصوبوں کے لیے مکمل انتظامی اور مالی معاونت فراہم کی جائے گی۔ انہوں نے افسران کو مریضوں کی نگہداشت، طبی تعلیم اور صحت خدمات میں بہتری کے لیے جدید اور اختراعی تجاویز مرتب کرنے کی ترغیب دی۔
صحت کے شعبے میں ٹیکنالوجی کے بڑھتے ہوئے کردار کا ذکر کرتے ہوئے چیف سیکریٹری نے ورچوئل میڈیکل بورڈز کے دائرہ کار کو مزید شعبوں اور اداروں تک وسعت دینے کی ہدایت دی۔ انہوں نے ’’گرینڈ راؤنڈز‘‘، آن لائن تعلیمی سیشنز اور ورچوئل تدریسی پلیٹ فارمز کو بھی دور دراز طبی اداروں تک متعارف کرانے پر زور دیا تاکہ ڈاکٹروں کی مسلسل پیشہ ورانہ تربیت اور مریضوں کے علاج کے معیار میں بہتری لائی جا سکے۔
چیف سیکریٹری نے تمام طبی اداروں میں فرائض، ذمہ داریوں اور جوابدہی کا واضح فریم ورک وضع کرنے کی بھی ہدایت دی تاکہ ہر سطح پر ذمہ داریوں کا تعین اور ان کی پیمائش ممکن ہو سکے۔
اجلاس میں چیف سیکریٹری نے محکمہ صحت و طبی تعلیم کو ہدایت دی کہ آئندہ چھ ماہ، ایک سال اور دو سال کے لیے صحت خدمات، طبی تعلیم اور تحقیق کے شعبوں میں قابلِ پیمائش اہداف اور سنگ میل مقرر کیے جائیں۔انہوں نے میڈیکل کالجوں میں ایم بی بی ایس، پوسٹ گریجویٹ اور سپر اسپیشلٹی نشستوں میں اضافے کے لیے بھی مربوط کوششوں کی ضرورت پر زور دیا تاکہ موجودہ انفراسٹرکچر اور انسانی وسائل کا بھرپور استعمال یقینی بنایا جا سکے۔
کمشنر سیکریٹری صحت و طبی تعلیم ایم راجو نے اجلاس کو بتایا کہ مختلف طبی اداروں میں 300 ایم بی بی ایس نشستوں، 243 ایم ڈی/ایم ایس نشستوں، 64 ڈی ایم/ایم سی ایچ سپر اسپیشلٹی نشستوں اور اضافی ڈی این بی نشستوں کے اضافے کی تجاویز پیش کی جا چکی ہیں، جن میں سے کئی کو نیشنل میڈیکل کمیشن اور دیگر ضابطہ کار اداروں سے منظوری کے مراحل سے گزارا جا چکا ہے۔
اتل ڈولو نے مزید بتایا کہ ٹیلی-مانس اور ٹیلی-سائیکائٹری خدمات بڑے طبی اداروں میں فعال کر دی گئی ہیں جبکہ منشیات سے نجات اور ذہنی صحت سے متعلق سہولیات میں نمایاں توسیع کی گئی ہے۔
اجلاس میں بتایا گیا کہ منشیات کے استعمال سے متعلق امراض کے لیے تین سطحی خدماتی نظام بھی تیار کیا گیا ہے، جس کا مقصد روک تھام، علاج، بحالی اور کمیونٹی سطح پر معاونت کو مضبوط بنانا ہے۔
ڈائریکٹر سکمز ڈاکٹر اشرف گنائی نے اجلاس کو بتایا کہ سکمز، سرکاری میڈیکل کالجوں اور ایمز جموں کے درمیان مشترکہ طبی تحقیق کو فروغ دینے کے لیے ’’جموں و کشمیر ریسرچ کنسورشیم‘‘ قائم کیا گیا ہے، جو مستقبل میں طبی تحقیق، اختراع اور شواہد پر مبنی پالیسی سازی کو تقویت دے گا۔
قبل ازیں شری ماتا ویشنو دیوی انسٹی ٹیوٹ آف میڈیکل ایکسیلنس کے ایگزیکٹو ڈائریکٹر ڈاکٹر یشپال شرما نے یونین ٹیریٹری میں صحت شعبے کے تحت نافذ کی گئی مختلف اصلاحات پر تفصیلی پریزنٹیشن پیش کی۔
انہوں نے بتایا کہ نیورولوجی، سائیکائٹری، شعبہ زچہ و بچہ، اینستھیزیالوجی، سرجری اور کمیونٹی میڈیسن سمیت مختلف شعبوں میں متعدد ورچوئل میڈیکل بورڈز کامیابی سے منعقد کیے جا چکے ہیں۔
انہوں نے مزید کہا کہ سات نئے سرکاری میڈیکل کالجوں میں ٹیلی-آئی سی یو سہولیات قائم کرنے کی تجویز زیر عمل ہے، جبکہ دور دراز اور پسماندہ علاقوں میں بروقت ماہر ریڈیولوجی خدمات فراہم کرنے کے لیے ٹیلی-ریڈیولوجی نظام بھی متعارف کرایا جا رہا ہے۔
آئی ایم ایچ اے این ایس سری نگر کے سربراہ ڈاکٹر ارشد دادا نے منشیات سے نجات کی خدمات کے فروغ اور ’’سرکل آف کیئر‘‘ پروگرام کے تحت۳۲۰۰سے زائد نچلی سطح کے کارکنوں کی تربیت سے متعلق روڈ میپ پیش کیا۔ انہوں نے بتایا کہ اس اقدام کا مقصد کمیونٹی سطح پر ابتدائی نشاندہی، مشاورت، ریفرل اور بحالی کی خدمات فراہم کرنا ہے۔
اجلاس میں خوراک کے تحفظ (فوڈ سیفٹی) کے شعبے میں کیے گئے اقدامات کا بھی جائزہ لیا گیا۔ چیف سیکریٹری کو بتایا گیا کہ ضابطہ جاتی نظام کو مضبوط بنانے، لیبارٹریوں کی توسیع، عملے کی تربیت اور عوامی بیداری مہمات کے ذریعے نمایاں پیش رفت حاصل کی گئی ہے۔
انہیں بتایا گیا کہ گزشتہ مالی سال کے دوران۱۷۰۰ سے زائد فوڈ سیفٹی مقدمات نمٹائے گئے جن کے نتیجے میں۱ء۶۷ کروڑ روپے سے زائد جرمانے عائد کیے گئے، جبکہ لیبارٹریوں کی جدیدکاری اور جانچ کی صلاحیت میں بھی اضافہ کیا گیا ہے۔
اجلاس میں ذہنی صحت، جگر کی پیوندکاری (لیور ٹرانسپلانٹ) خدمات اور دانتوں کے علاج کی سہولیات کو مزید مضبوط بنانے سے متعلق آئندہ اقدامات پر بھی غور کیا گیا۔ اس دوران بتایا گیا کہ جموں و کشمیر میں جدید جگر اور صفراوی امراض کے علاج کی سہولیات قائم کرنے کے لیے ملک کے ممتاز اداروں کے ساتھ اشتراک کا عمل شروع کر دیا گیا ہے۔
اجلاس کے اختتام پر چیف سیکریٹری نے کہا کہ ان تمام اصلاحات کا بنیادی مقصد جموں و کشمیر کے ہر شہری کو معیاری، سستی اور آسانی سے دستیاب صحت خدمات فراہم کرنا ہے۔ انہوں نے صحت کے شعبے میں ٹیکنالوجی، تحقیق، استعداد سازی اور ادارہ جاتی اشتراک کو بروئے کار لا کر یونین ٹیریٹری کے طبی نظام میں انقلابی تبدیلی لانے کی ضرورت پر زور دیا۔
