سرینگر؍۲جون
جموں و کشمیر لوک بھون میں آج لیفٹیننٹ گورنر منوج سنہا کی موجودگی میں تلنگانہ کے یومِ تاسیس کی تقریب منائی گئی۔
اس موقع پر خطاب کرتے ہوئے لیفٹیننٹ گورنر نے کہا کہ یہ ایک دلچسپ اور قابلِ ذکر اتفاق ہے کہ جموں و کشمیر اور تلنگانہ دونوں کو بھگوان شیو کی مقدس سرزمینوں کے طور پر تسلیم کیا جاتا ہے۔
سنہا نے تلنگانہ کی شاندار ادبی روایات کا ذکر کرتے ہوئے کہا کہ اس خطے کی عظیم ادبی شخصیات نے معاشرے میں شعور بیدار کرنے اور فکری رہنمائی فراہم کرنے میں اہم کردار ادا کیا ہے۔
لیفٹیننٹ گورنر نے کہا، ’’گیارہویں صدی کے شاعر ملیا ریچنّا کی شاعری سے لے کر جدید دور کی شخصیات آتریا اور داسارتھی کرشنماچاریولو کے تخلیقی افکار تک، تلنگانہ کی ادبی روایت نے ہندوستانی ادب کو بے حد مالا مال کیا ہے۔ قدیم زمانے سے اس خطے کی عظیم ہستیوں نے سماجی شعور بیدار کرنے اور اصلاحِ معاشرہ کے لیے غیر معمولی خدمات انجام دی ہیں۔‘‘
اس موقع پر انہوں نے آزادی کے عظیم مجاہدین اور قبائلی رہنماؤں رام جی گونڈ، کومارم بھیم اور الّوری سیتاراما راجو کو بھی خراجِ عقیدت پیش کیا۔
لیفٹیننٹ گورنر نے کہا کہ تلنگانہ کے کسانوں، فوجیوں، سائنس دانوں، صنعت کاروں، شاعروں اور فنکاروں نے قوم کی تعمیر و ترقی میں گراں قدر خدمات انجام دی ہیں۔
سنہا نے کہا، ’’جس طرح ہر شہری ہماری مشترکہ ترقی میں اپنا حصہ ڈالتا ہے، آئیے ہم عہد کریں کہ اپنی گوناگونی سے طاقت حاصل کریں، اپنی عظیم ثقافت کا جشن منائیں اور ایک خوشحال مستقبل کی جانب مل کر پیش قدمی کریں۔‘‘
