حجاج کو تمام ضروری سہولیات فراہم کرنے کی ہدایت ‘واپسی کا سلسلہ ۱۶ جون تک جاری رہے گا‘
ندائے مشرق خبر
سرینگر؍۲جون
جموں و کشمیر کے حج عازمین کا پہلا قافلہ منگل کے روز سری نگر بین الاقوامی ہوائی اڈے پر پہنچ گیا، جس کے ساتھ ہی حج۲۰۲۶کے واپسی مرحلے کی کارروائیوں کا آغاز ہو گیا۔
پہلی پرواز کے ذریعے۱۴۴حجاج کرام سری نگر پہنچے، جن کا استقبال جموں و کشمیر کے وزیر اعلیٰ عمر عبداللہ، مشیر ناصر اسلم وانی، ڈپٹی کمشنر بڈگام اطہر عامر خان اور سول و پولیس انتظامیہ کے دیگر اعلیٰ افسران نے ہوائی اڈے پر کیا۔
حجاج سے بات چیت کرتے ہوئے وزیر اعلیٰ نے امید ظاہر کی کہ ان کی دعائیں اور روحانی تجربات جموں و کشمیر اور پورے ملک کے عوام کے لیے امن، خوشحالی اور فلاح و بہبود کا باعث بنیں گے۔
عمرعبداللہ نے سعودی عرب میں قیام کے دوران حجاج کرام کے لیے کیے گئے انتظامات اور ان کے واپسی سفر کے بارے میں بھی دریافت کیا اور ان کی اچھی صحت، خوشیوں اور بابرکت زندگی کے لیے نیک تمناؤں کا اظہار کیا۔
وزیر اعلیٰ نے سری نگر ہوائی اڈے پر حجاج کرام کی آمد اور استقبال کے لیے مختلف محکموں اور اداروں کی جانب سے کی گئی کاوشوں کو سراہا۔ انہوں نے متعلقہ حکام کو ہدایت دی کہ واپس آنے والے حجاج کے لیے تمام ضروری سہولیات اور امدادی خدمات، بشمول سامان کی بروقت ترسیل، نقل و حمل اور دیگر معاونت، یقینی بنائی جائے۔
عمرعبداللہ اس سے قبل بھی حجاج کے سامان کی ترسیل میں تاخیر کے معاملے کو حکومت ہند اور متعلقہ حکام کے ساتھ اٹھا چکے ہیں۔ مرکزی وزیر ہوا بازی کو ارسال کردہ اپنے مکتوب میں انہوں نے سامان کی بروقت فراہمی اور اس کی ہموار ترسیل کی ضرورت پر زور دیا تھا۔
میڈیا سے گفتگو کرتے ہوئے جموں و کشمیر حج کمیٹی کے چیف ایگزیکٹو آفیسر ڈاکٹر شجاعت احمد قریشی نے کہا کہ پہلی واپسی پرواز میں شامل تمام۱۴۴حجاج بحفاظت سری نگر پہنچ گئے ہیں۔انہوں نے بتایا کہ اس قافلے میں۷۴ مرد اور۷۰ خواتین حجاج شامل تھے۔
ڈاکٹر قریشی نے کہا کہ واپس آنے والے حجاج کرام کی سہولت کے لیے ہوائی اڈے پر تمام ضروری انتظامات کیے گئے تھے، جن میں ٹرانسپورٹ، طبی امداد، رہنمائی مراکز (ہیلپ ڈیسک) اور آبِ زم زم کی تقسیم شامل ہے۔
سامان کی پابندیوں سے متعلق خدشات کے بارے میں بات کرتے ہوئے ڈاکٹر قریشی نے کہا کہ آپریشنل وجوہات کے باعث تقریباً۴۰فیصد سامان ابھی موصول ہونا باقی ہے اور توقع ہے کہ یہ آئندہ دو سے تین دن کے اندر حج ہاؤس پہنچ جائے گا۔
انہوں نے مزید کہا کہ جن حجاج کو اپنا سامان حج ہاؤس سے وصول کرنا ہوگا، وہ سہولت کے ساتھ سامان حاصل کرنے کے لیے حج ہاؤس کی جانب سے جاری کردہ شناختی کارڈ اپنے ہمراہ لائیں۔
قابلِ ذکر ہے کہ جموں و کشمیر اور لداخ کے حجاج کرام کی واپسی کا عمل۱۶ جون تک جاری رہے گا۔ موجودہ مرحلے کے دوران مجموعی طور پر۳۹۵۲ حجاج سری نگر امبارکیشن پوائنٹ کے ذریعے واپس پہنچیں گے۔
