ایجنسیز
سرینگر؍۷مئی
کانگریس کے سینئر لیڈر اور اے آئی سی سی کے جنرل سیکریٹری غلام احمد میر نے جمعرات کو کہا کہ اُن کی اتحادی جماعت نیشنل کانفرنس کو یونین ٹریٹری سے متعلق معاملات پر وقتاً فوقتاً کانگریس کو باخبر رکھنا چاہیے۔
اننت ناگ میں نامہ نگاروں سے بات کرتے ہوئے میر نے کہا کہ اہم معاملات پر کانگریس کی مرکزی قیادت کے ساتھ بھی تبادلۂ خیال ہونا چاہیے اور بظاہر اس وقت اس پہلو کی کمی محسوس کی جا رہی ہے۔
میر نے کہا کہ اتحاد میں سب سے بڑے لیڈر اور جموں و کشمیر کے وزیر اعلیٰ عمر عبداللہ کو اس مواصلاتی خلا کو پُر کرنے کے لیے پہل کرنی چاہیے۔
کانگریسی لیڈر نے یہ بھی کہا کہ کانگریس کا وسیع تر نظریہ ہمیشہ ملک بھر میں سیکولر قوتوں کو مضبوط کرنا اور فرقہ وارانہ سیاست کا مقابلہ کرنا رہا ہے، تاہم انہوں نے خبردار کیا کہ پارٹی کی سیکولر رسائی کو اُس کی کمزوری نہ سمجھا جائے۔
میر نے کہا کہ کانگریس نے ملک بھر میں سیکولر سیاست کو مضبوط بنانے کے مقصد سے چھوٹی اور علاقائی جماعتوں کے ساتھ تال میل اور اتحاد قائم کیا ہے۔
میر نے کہا کہ پارٹی کے رویے کو کمزوری سے تعبیر نہیں کیا جانا چاہیے۔ انہوں نے کہا، ’’ایسا محسوس نہیں ہونا چاہیے کہ صرف کانگریس ہی پہل کرتی رہے جبکہ دوسرے محض اس کا فائدہ اٹھاتے رہیں۔‘‘
